公仔箱論壇 - Powered by Discuz! Board

標題: 【睇通睇透】齊飛唞夠再搏過（魯賓遜 [打印本頁]

作者: 02754566 時間: 2016-5-23 11:07 PM 標題: 【睇通睇透】齊飛唞夠再搏過（魯賓遜

季尾好多舊馬都跑得攰，加上跑道的草地狀況變差，近期賽事前領馬優勢極大，蔣嘉琦騎馬通常擺前走，早佔先機的情況下，這位女將創下連續十次賽事有馬贏的紀錄。「帝豪寶貝」及「翡翠紅星」上仗分別在莫雷拉及潘頓胯下落敗及只上名，今場換上女見習生即贏，除了減七磅的幫助外，前段盡量擺前走，亦是贏馬的關鍵因素。
本周日五班千六米報名正選馬「齊飛」，今季首戰贏田草1400米，由頭帶到尾贏個半馬位，但當日頭三段慢標準半秒，可見贏在步速之利，難怪加分後未能再贏，六歲馬能力捉襟見肘。之後體重不斷上升，情況有放緩求減分的味道，如今比季初贏馬時仲低四分，評分重返可爭勝的水平。
Ishiguru子嗣雖然在港主要是中下班次馬，但普遍能夠贏馬，而且表現耐拼，好似今季贏馬的「奄尖大少」(九歲)、「元豐泰」(八歲)、「吉祥」(八歲)等。而七歲的「創出商機」今季更加兩W兼突破在港評分新高。
「齊飛」現時亦僅六歲，季內亦曾經贏馬，有理由相信依然有戰鬥力。今次相隔五星期再跑，期間四度安排與廐侶拍跳，動態積極。過往跑過同程三次都入前五名，而今次是季內首度角逐此程，同場快馬並唔多，前段能夠搶出帶頭跑的機會甚高，季尾五班賽擺前點都着數，如配見習生多減幾磅，更可提升爭勝機會。

歡迎光臨公仔箱論壇 (http://www2.tvboxnow.com/)