公仔箱論壇 - Powered by Discuz! Board

標題: 同主打吡亞軍下午退役！鞋王另一愛駒極刁鑽走位開齋 [打印本頁]

作者: 02754566 時間: 2016-6-16 12:54 AM 標題: 同主打吡亞軍下午退役！鞋王另一愛駒極刁鑽走位開齋

賽馬世界好奇妙，既有輸開繼續輸，亦有贏開就贏，資深馬主鞋王Le Saunda老闆李子彬，其新抱李皓玲的550萬應屆拍賣馬「可人兒」剛周日初出即贏，帶給家族上下今季第一Win。到這晚谷草第三場四班1200米，輪到李子彬自己的「罕曾見」建功。
方嘉柏訓練的「罕曾見」今次換上潘頓，留前鬥後，直路冇乜位潘頓左穿右插，騎者走位極度刁鑽，結果短馬頭位力壓拍住佢一齊殺上的「駿瑪」影相贏馬，本身既打開在港出賽勝門，亦成為季內李子彬名下首匹勝出馬，單Win及組合獨贏A1，分別派40及17元正。「駿瑪」則做阿二。
適逢李子彬另一愛駒上年打吡亞軍「直震撼」這天下午退役，「罕曾見」今次贏馬更顯得矜貴。至於潘頓連同頭場沈廐「領航大師」在內，先後幫兩駒開齋，自己連續第二次賽事起孖，方嘉柏亦延續3月至今齋贏谷草不贏沙田的紀錄。
今場嘉琦的落飛熱門「風雷」衝閘走甩退出，令到大熱門「八運」熱上加熱，在柏寶胯下搏盡只得第三，第四名是初出的「包裝巨星」，四重彩派7,378元。
李子彬表示，賽前曾問過方嘉柏「罕曾見」跑開一哩縮程跑1200米是否可勝任，小方就話自己馬房1200米成功率很高，不用擔心，李子彬話不得不讚小方部署精明。小方則說「罕曾見」跑一哩常搶口，但1200米步速偏快，反而留放得舒服。

歡迎光臨公仔箱論壇 (http://www2.tvboxnow.com/)