標題:
[新聞]
【Emily】餵飼野貓惹鼠患？ 官方防鼠先捉貓 網民質疑…… 貓貓「食死貓」
[打印本頁]
作者:
manyiu
時間:
5 天前 12:14 PM
標題:
【Emily】餵飼野貓惹鼠患？ 官方防鼠先捉貓 網民質疑…… 貓貓「食死貓」
2024年11月15日星期五
環境局日前話漁護署會將喺灣仔海堤出沒嘅貓「移離」，以解決鼠患。圖為記者日前喺灣仔海旁遇到嘅社區貓。（賴俊傑攝）
環境及生態局前日喺facebook出帖，話署理局長黃淑嫻（左二）去咗灣仔海堤了解鼠患，又話政府部門已經放置T型鼠餌盒（紅圈），漁護署亦會去捉貓。（環境局fb）
【明報專訊】近日有報道話有人喺灣仔海堤餵流浪貓，惹來鼠患，環境及生態局前日喺facebook話，處理方法包括由漁護署將現場出沒嘅貓「移離」。帖文一出，隨即引起網民批評，「搵得漁護即係諗住殺貓」，反問「咁多區都有鼠患全部都入晒啲貓數？」有人仲留言話鼠患大多係人為造成，「係咪要移遷晒啲人類去月球」，反問環境局去捉貓，「講乜嘢生態？」
漁護署噚日回覆話，日前接獲相關部門轉介話灣仔海堤有流浪貓，於是到場跟進，直至噚日未有帶走任何貓。被問到捉到貓會唔會人道毁滅，署方就無直接回應，但就話若發現流浪貓，會帶去轄下嘅動物管理中心，亦會核對報失紀錄，如果確定貓已報失，會叫主人領回，無人認領嘅貓若果健康良好，經獸醫評估適合，就會安排領養。
環境局前日喺facebook出帖，話署理局長黃淑嫻去咗灣仔海堤了解鼠患，而食環署就有人放食物餵貓，發咗3張定額罰款通知書，仲話漁護署會派人捉貓。食環署話上月收到投訴，於是採取突擊行動，上月30號至前日發出3張定額罰款通知書，提醒喺公眾地方扔棄食物碎屑係違例，可被票控罰款3000元，屢犯者會被檢控，最高罰款2.5萬元同坐監半年。
歡迎光臨 公仔箱論壇 (http://www2.tvboxnow.com/)
Powered by Discuz! 7.0.0
