限量英版 Civic　白裏透紅

早排 NSX專門店 Nevaeh，返咗架英國版 Civic，斬尾款勁似辣版 Jazz，估唔到最近連全球限量僅 200部嘅特別版，都投到返嚟。呢架香港「唯一」，白雪雪外殼配火紅內櫳，似足白裏透紅嫩口模， 18歲到 80歲男人，肯定都會望到流鼻血。

男人待車地位等同老婆大人，周街望到辣車當 Hot Girl咁，呢啲唔係性別歧視，而係出於欣賞同尊重嘅角度。望住邦哥剛投標返嚟嘅限量版 Civic，雪白車身卻沒半點純情味道，頭唇尾唇大變臉，更有力更立體設計，配搭左右網狀欄柵，仲要黑白相冲，寸味滿到瀉，襯番一字排開嘅頭燈同鬼面罩，以及倒三角霧燈，儘管外表偏肥偏矮又白雪雪，但喺街遇着佢都要敬畏三分，讓番條快線畀佢過。香港周街都見到四門版 Civic， FN2玩單門無尾已經型過一般四門飛仔車，呢架仲係全球限量 200部嘅特別版，絕對係罕中之罕。其實由 Honda接受投標申請到運車來港， Nevaeh已搞咗四個月，佢話由於架車未打稅，中標價唔方便講，不過能成為香港首部，齋計唯我獨尊嘅虛榮心，真係幾辛苦都值得。

■限量版 FN2換上雪白衣裳，但賣相勁辣。

■普通版單門無尾 Civic（ FN2）香港本身已經罕有。

■三幅式軚環有齊多功能快捷鍵，相當有手感。

■波棍位有全球限量編號。

■換咗更具層次美感嘅頭唇，以及網狀欄柵。

■尾唇都有改動，尾喉亦有加大，更有氣勢。

■ Honda依然故我唔玩 Turbo，不過 2,000cc i-VTEC好夠爆。

獨立編號最搶眼
對比白色車身，火紅襯啞黑內櫳先係真性情所在。一對採用仿麖皮物料嘅 Type R桶椅，標明正身係辣車，實際上承包感亦相當足夠，左右夾緊但又不致太逼狹，攻急彎時司機及乘客都唔會左右猛 Fling。最得 Civic Fans歡心嘅，唔係車內一堆火辣裝備，而係六速棍波前嘅一個金屬章，大大隻 Type R、無限 Mugen Logo，再加限量版獨立編號，嗰種稀有度，勝過你喪加碳纖 Parts多多聲。引擎規格跟 09款 FN2相若，用番 K20Z4直四引擎系列，馬力為 201匹，雖然 Honda唔多願玩 Turbo，不過 NA車仍然好出色，架 FN2爆起上嚟依然有震撼力。最大改動處係加咗 LSD防滑差速系統，令到入彎時四個轆嘅轉速有所不同，達致限滑差速效果，對操控一架辣車嚟講就更為得心應手。