Hyundai 突圍　豪裝Man味足

SUV=豪邁、活力；七人車=戀家。將兩者混合，竟不是火星撞地球般格格不入，反而產生了特殊化學作用，呢種反應可以喺 Hyundai Santa Fe 2.4身上搵到答案。外形瀟灑外，還有齊七座優點，尤其是最新 Facelift版，更將其優點逐一強化，保證讓你折服。

■改成修長的排氣喉，帶來不少跑味。

■換上 LED煞車燈，特別醒神。

早十多年前，買韓國車的人無非貪佢夠平；不過今時今日，韓國車與日本車無論喺性能定款式已相當接近，加上日圓滙價高企，兩者車價越拋越遠，令韓國車吸引力進一步上升。講咁多，當然有辦你睇， 2010年 Facelift版的 Santa Fe正是最佳例子。 Santa Fe係 Hyundai成功喺香港突圍的 SUV，廿零萬售價已經夠吸引，完全切合車主要求──型和實用，兼且仲有豪華呢個元素。雖然今次只係改款版，但卻由外至內大改造，新 Santa Fe共分三個不同版本，但代理暫時只入 2.4公升版本。先講外形，車身增強線條，營造剛強硬朗的車形，車頭改為三間式鬼面罩，氣壩、前泵把都經過重新設計，至於側鏡，亦增加 LED指揮燈。車尾用上透明尾燈燈組，圓形尾燈眼仔睩睩，感覺精靈過人，加上頂置擾流器的 LED煞車燈號，一派歐洲車風格。不過向來「小心眼」的我，反而覺得由原來橢圓形改為長身喉形的雙出式排氣喉，意外地帶來一點跑味。

■寬敞的車廂，做司機都係一種享受。

■真皮座椅，舒服到瞓得着。

■渾圓的尾燈設計，特別精靈。

■重新設計的中控台，以木紋裝飾， SUV都要豪。

安全系統包實你
踏入車廂，心嗰句，真係舒服到暈，寬敞的車廂簡直有家的感覺，真皮座椅加上中控台的木紋裝飾，帶出不少豪味。軚環的中央按鈕，音響聲浪任你調校，後排座位空間感十足不特止，仲有埋獨立冷氣。不過講求環保的年代，任何車款，都以慳油為大前提， Santa Fe今次將沿用多年的 2.7公升 V6引擎換掉，取而代之是一副 2.4公升 Theta II引擎，加上由原來的 4速波箱換成 6速+/-自動波，雖然將最高輸出馬力 188匹稍降至 174匹，但就做到更慳油的效果。根據廠方數字提供，混合油耗（市區加高速）只需 8.1L/100km，每公里油耗只是$1.13，以一輛豪華型 SUV而言，已算慳油。買得四驅車，崎嶇山路當然最能發揮其實力， Santa Fe用上一套新安全系統，行駛時監測車輛，預計車輛傾側角度而預先啟動雙側面窗簾式安全氣袋，務求包實你，安全感當堂倍增。