時速 8公里煞掣轉電慳油 Smart Girl

女仔揀車好簡單，外形可愛、易揸易泊，甚麼馬力扭力根本唔在乎，更毋須知道 smart fortwo新車 mhd副 Hybrid偈點運作，聽Sales話每公里 6毫子有找，就已即時觸動條「慳根」，停燈位仲曉自動熄偈咁神奇？直頭覺得自己係環保 SmartGirl喇。

慳得一蚊得一蚊
香港單係 smart fortwo已經有 6個型號，不過最突破嘅變種，就非今日呢架 mhd（ Micro HybridDrive）莫屬。首次採用油電混能系統，一公升油大概可行 23.2公里，約$0.59/km，比同款汽油版足足慳 19%，最人無佢有嘅，係配搭「Start/Stop」系統，每當紅燈前踩 Brake等停時，車速低過8km/h就會自動熄引擎，齋以電能慢溜後停車，起步後先着番副偈，一般斯文揸法根本唔覺油電交替運行，不知不覺間同你慳番唔少油。有慳油科技但賣得更平，比汽油版 fortwo Coupe仲要平 2.1萬，不過暫時到港只得入門 Pure版，行 NA或 Turbo偈嘅passion版到貨日期則未定。呢副 Hybrid偈慳到油似乎對馬力提升無乜幫助， 999cc有埋 5前速加減自動波，女仔揸幾Perfect；極速更高達 145km/h，大意啲隨時超速㖭呀。

■混能版同舊款汽油版，外形上完全一樣。

■ smart fortwo的骰到痹，女仔扭 S位無壓力。

■上下對開式尾門，穩陣到可以當凳坐。

最緊要安全
11萬多啲買架 Benz旗下新車，着實有點不可思議，但若你年紀只係二十出頭，可能會嫌棄車櫳膠感太重，加上側鏡需手動調校、15"鐵皮軨等，唔多似歐洲出品喎；但三十出頭嘅我，偏偏覺得手校側鏡同鐵皮軨，充滿懷舊味道超有Feel。至於膠感的確稍重，咁嘅車價無可能皮櫳皮椅＋桃木啩？可以話你知，造車成本擺重落車架硬度，以及前後擊潰空間設計度，更係全球兩大安全指標北美IIHS、歐洲 NCAP撞擊測試中，分別攞到 9個 Good同 4星評級，莫講話同級車仔，好多大型房車都無佢咁高分。加埋 ESP電子操控、ABS制動、電子煞車力道分配、雙安全氣袋等保命靈丹，你唔會再嫌 mhd唔夠豪華，花少少執靚架車好簡單，始終命仔先係無價。