300匹暴辣小青椒

要惡唔一定要大隻，細細粒都可以係辣椒仔。喺歐洲賣個滿堂紅，被譽為當今最強嘅前驅掀背跑車 Ford Focus RS就係好例子，車仔細細但就有300匹馬力， 2.5公升直五 Turbo引擎，加速入彎嘅強悍度同狠辣，包嚇到你目瞪口呆

■有別於一般青綠色，混入珍珠閃底，效果奪目。

青綠混耀眼珍珠
由歐洲發表 Ford FocusRS開始，代理會入貨嘅消息甚囂塵上，搞到班車迷心急如焚。代理究竟入定唔入？呢一刻仲係傳聞，因為歐洲嗰邊都供不應求，唔想排隊就要加7,000英鎊先有現貨到手。等唔切啦！搶先搵架水貨車試真章先止咳。從遠處見呢架 FocusRS駛近，未了解佢內涵有幾勁，就已經俾佢嘅閃亮青綠車身吸引住目光。特別搶眼嘅原因係要近睇先搵到答案，耀眼嘅珍珠底混入青綠色，立刻凸顯到呢架RS嘅不平凡，不過訂貨時選呢隻綠色係需要加錢㗎。四四方方嘅四驅跑車造型，配上大口徑雙出死氣喉、大包圍及高置黑色尾翼，令呢隻青椒仔變得更耀眼。話雖如此，幸好RS始終係外形感覺踏實嘅車款，所以未致令人覺得係太過招搖生事嘅車款，惟獨車頭嘅黑色特大梯形鬼面罩及微微揚起嘅頭燈，從正面睇先聯想到係辣車一部。

1.跑得嘅車點會無呢隻高置尾翼。

2.歐洲車偏向平實，開車頭蓋仲係要用匙。

3. Diffufser為車尾加壓令入彎更穩定。

4.微微揚起嘅車頭燈外形吸引，裏面更有黑色鐵架點綴大燈。

5.黑色碳纖中控台及 6CD、 MP3碟機都係加 Luxury Pack有先。

6.特大 19寸輪胎霸氣十足。

7.立體圓形錶板，加黑底紅字顯示屏，清晰搶眼。

8.車頭位置有 3個細小圓形錶顯示水溫、 Turbo及油壓，水滴形顯示針十分有型。

9.六前速手波，免匙系統已經係最有科技感嘅地方。

嬌小外表瘋狂本性
一向係近年WRC世界越野錦標賽嘅爭標大熱，有名氣固然有一定實力，被譽為近代最強掀背車，並唔係因為咩電子科技幫助或高智能配備，反而偏向機械工程上嘅突破發展。新一代嘅 RS首次採用前輪驅動，唔少人都擔心 300匹馬力嘅車會有搶軚或推頭嘅情況，但福特車廠就全新研發咗一個RevoKnuckle前懸掛設計及新式 Quaife ATB限滑差速器，大大減低搶軚問題，令加速入彎非常輕鬆自如。有 0-100km/h只需5.9秒嘅勁度，除咗引擎，還需要輪胎嘅配合，特大 19吋胎軨要刻意加闊前後輪拱，再有埋 44.9kgm嘅扭力，呢部狂野小跑表現近乎瘋狂。