EURO 5車仔11萬搶灘

體積輕巧汽缸容積細嘅車仔市場，同慳油空氣好嘅環保之路，都係汽車界兩大必爭之地。今日加入戰團有鈴木 Alto，有又慳油又環保嘅 EURO5（歐盟五型）廢氣排放標準打頭炮，加埋車行賣大包自家再減成萬稅，要分呢塊餅仔就真係 So easy。

迷你揭背可愛又多色
久久未有新作嘅 SUZUKI，自從舊年巴黎車展上展出新一代 Alto，唔少人都將焦點擺放喺呢部以 EURO5掛帥嘅全新小型揭背車仔之上。香港代理終於喺今個月正式引入呢部新一代 Alto，全新造型同樣的骰可愛，全車車身只有 3.5米長、總重1,250公斤，輕巧細小嘅車身體積，感覺就好似一部縮咗水嘅揭背車。對於一向係設計K-Car能手嘅鈴木而言，要車身有得意外形絕對係手到拿來嘅事，幫Alto加咗一對水滴形眼睛、一個圓潤大嘴巴嘅鬼面罩，車頭趣致可愛嘅樣貌又再一次證明佢哋喺車仔設計上嘅成功。加埋九種車身顏色選擇，更有市場較少見嘅紫粉紅色（ Fortune Rose Pearl Metallic），想唔討一眾女孩子歡心都好難。

■加速表現不及大馬力車，但載三個人重量，上斜一樣十分暢順。

■拍低後座，同樣有寬敞嘅儲物空間。

■車仔細細一樣有四門，後門的骰可愛，只有一個人咁闊多少少。

■後排車窗只可推開一條縫隙，有趣。

自家減稅慳多 1萬
作為香港鈴木今年重頭戲，其實 Alto除咗有全新造型攻打呢一場硬仗，當然仲有強勁嘅內涵作後盾。先數備有1公升低容積汽缸嘅同級對手十分少，可以符合歐盟 5型 EURO 5廢氣排放標準嘅對手更少之又少。香港家大部份新車都只係符合 EURO4標準，新一代更環保嘅 EURO 5標準固然係更慳油、二氧化碳排放更少，走在最前嘅新準則可以慳荷包又可為環保出一分力。雖然最大馬力只得67匹、最大扭力只得 90Nm，但細小輕巧嘅車身中和咗數字上力量嘅不足，加埋最少轉向半徑只得4.5米嘅靈活，入彎、泊車等操控表現令人更得心應手。佢可愛嘅造型絕唔係得個樣，流線型車身設計引入航空動力學原理，加強速度又可節約能源；安全設計上又加入全方位操控技術系統（ TECT）、防鎖煞車及電子制動力分佈系統（ABS+EBD）等保護，強化車主對細車安全性嘅信心。總結家輕型小車市場上嘅戰況， Alto易控安全又有外形，有埋快人一步嘅 EURO5作招徠，車價都係 11.9萬元，十分經濟。咁都未夠，香港代理仲自家再減 30%稅務優惠畀車主，大嗱嗱慳番成萬蚊，計埋1公升車仔牌費保險又係只畀入場費，真係啱晒一眾心癢癢想買車嘅新牌仔入門。