趙學而× Murcielago　《聽聽》高清引擎聲

以為趙學而近年棄歌從影，原來已第二年自資出碟。訪問當年夢中情人，梗要搵番架 DreamCar襯佢，林寶夠照啩？點知學而心直口快：「着裙上落好辛苦，跑車都係襯男人。」口係咁講，卻偏愛引擎高轉咆哮，呢日，聽嗰個同踩油嗰個，同樣極High。記者：徐影龍攝影：陳陶鈞鳴謝： David Lee趙學而劈住林寶試新碟。

聽聲爽過揸車

■學而最愛聽跑車強勁嘅咆哮聲，覺得好 Powerful。

知道訪問學而，身邊老死都忍唔住問，乜佢仲有出碟咩？唔係大路 K歌人氣度點都差啲，不過上年大膽自資出碟《聽》，轉戰更有消費力嘅高清CD級別，連向來腌尖發燒友都一致好評。今年添食再出，《聽聽》限量版更被人炒高三倍，女人仔學而算係殺出血路。就好似林寶 89年推出嘅旗艦Murcielago咁， Audi接手後將其改良成新嘅 LP670-4 SV，只要骨子裏優質傳統不變，林寶 Fans一樣爭住追捧。借嚟嘅係04年舊款 Murcielago，雖然比新版少30匹，但兇悍外形同嚇人叫聲，依然不失「大牛」本色。學而着住短裙高踭鞋，上落車難免辛苦，仲略有抱怨話呢類超級跑車，始終襯男人多過女人。主角唔賣賬，車行Sales竟二話不說跳上車空波踩油，轉數錶彈射飆升，高轉引擎聲同坼天氣喉聲震到成個海運天台停車場都聽到，學而即時發現狂牛魅力。「好鍾意引擎發狂嘅咆哮聲，離遠聽到聲已覺好型好 Man，根本唔會在意揸嗰個夠唔夠型仔。」

■「林寶馬力太大，都係啱男仔多啲。」

■中置引擎兩側係入風口，行車時會自動升起吸風。

■合金軨上二十幾口螺絲爆狂野感。

不反叛情歌

■學而話揸車練歌係一年 365日都會做嘅事。

Murcielago西班牙文解作蝙蝠， 6,500cc V12引擎，最大馬力達 640匹， 0-100km/h僅需3.4秒，絕對兇悍！咪以為引擎同氣喉咁嘈，坐喺車廂就好受罪，原來部車嘅隔音技術真係無得頂，就算無裝配頂級 Hi-Fi，喺車內聽CD一樣咁清咁靚聲，連風聲同胎噪都唔多覺，學而仲好投入咁邊揸林寶、邊跟住新碟唱歌，連《愛如潮水》呢類咁陰聲細氣嘅歌，一樣可以高清還原，睇到學而投入嘅表情，相信經過今日佢會對林寶大大改觀。學而近年轉揸七人車，一個女仔以咁大架車代步，都幾奇怪。「以前我好鍾意跑車、開篷車，覺得好型好Sporty，不過家反而享受同屋企人共處嘅時間，加上屋企連埋我啱啱好7個人，出外郊遊或遊車河時，都可以一齊傾偈同講笑，我好珍惜呢種溫馨家庭感覺，而且車廂闊落啲坐得舒服啲，有時開工都可以喺架車度休息吓。」三十出頭，不再反叛不再愛辣跑開篷，學而着緊親情多於愛情，揀七人車啱 o架喇。

■車櫳隔音完善， CD靚聲唔怕被引擎聲蓋過。

■ 04林寶已經轉玩自動波，學而好快熟習到架大牛。

CD新科技舊車都聽到

■《聽聽》以 HQCD錄製，後面隻 Deluxe版更被炒起 3倍。

學而 09年再度自資出CD，新碟《聽聽》更係全球首張以HQCD高清錄製嘅國語專輯，呢種制式採用特別嘅「和諧合金」物料，優點係還原度高及低失誤，連蔡琴、喜多郎出碟都係用呢種制式，算係未來高清CD大趨勢。最正係有別 SACD，普通CD機已可播放，就算舊式汽車音響，都毋須花錢換專用機頭。《聽聽》由日本直接壓碟，最值得欣賞係全部曲目都係一 Take過錄音，一碟11曲，全部翻唱經典國語歌，加入 Jazz及 Blues元素，舊曲新編別有風味。普通版約賣$160，附送多一隻美版 CD Single嘅Deluxe版，更被炒至$480，第二度自資出碟贏口碑有銷路，學而應該飲得杯落。

學而鏡頭下的林寶