賣樣唔賣豪Chimaera孖人保至尊

連Lotus都有架 Evora玩豪玩舒適，講簡約純力量小跑，數嚟數去得番 TVR貫徹始終。近排有架 03年 Chimaera放售，無Tuscan嘅波浪頭冚，但黑車配紅白拉花，再加如天九中嘅「孖人」頭尾燈，賣相依舊保有至尊級地位

唔算最寸　但已夠殺

英國傳統車廠 TVR，對玩款向有一手，上次架超 S波浪形 Tuscan Speed Six一話放盤，翌日已被識貨之人買走。無計，全港夾埋唔夠10架 TVR，少少錢就玩到人無我有，所以通常出一架就無一架。今次現身嘅係另一款 Chimaera，賣相較Tuscan「稍稍」內斂，無鬚刨頭唇同波浪頭冚，但呢架尾期款就將廠方傳統直排三盞頭燈改成四盞，頭同尾都好似有對「四筒」等碰咁有型。不過睇番全黑車身，中間由頭到尾拉咗條勁粗紅白帶，加埋頭燈嗰 8點，忽然間又覺佢以天九上嘅「人牌」，頭燈＋尾燈夾埋「孖人」，雖不及同廠嘅「天九」Cerbera同「地八」Tuscan咁大，但淨係搶眼外形，已足夠打低八成以上對手。四十幾萬當然唔會淨玩款，假假哋都叫開篷車，開晒篷親親大自然，夠晒Relax兼減壓，單單喺鬧市塞吓燈位，隔籬車同途人個個視線望住你，呢份矚目虛榮心，已經值回票價。跟Tuscan相比，同樣需要手動拆篷，可幸係一件過，尾窗向後摺就搞掂，懶人都無藉口唔開篷。

■錶板同軚盤原始得嚟好有英式跑車 Style。

1只需拆一塊車頂便可開篷，尾箱亦有足夠空間收藏。

2尾窗用上厚膠物料，可以隨意收摺。

3放得落成塊硬篷車頂，估得到尾箱幾咁大。

簡約兇獸　純力量玩法

■頭尾燈都係左右各自一開四，遠睇八粒圓點十足天九中的「孖人」。

Chimaera，希臘神話中嘅奇美拉，獅頭羊身蛇尾仲識噴火。現實中車同神一樣咁兇猛，動力核心係 Land Rover最後一款 4.0L V8偈，即係跟01年越野四驅 Discovery同一台引擎，扭力有幾勁可想而知。就算無 Turbo無 Supercharger，馬力一樣達 243匹，0-100km/h做到 4.7秒，全靠車身夠精簡夠輕。不過要駕馭Chimaera唔係咁易，大馬力＋棍波自然考功夫，全車更無何輔助設備，久違咗嘅駕駛樂趣，一定畀到你。內櫳玩火紅戰意，中央手枕位有層次嘅設計，特大金屬格仔暗花錶板等，都相當奪目，上手車主保養得幾好之餘，仲力保原廠風味。