Wish攝入 2010

七人車喺大時大節齊齊開心嘅時候就最大派用場！如願以償有部 Wish 2.0 Sports Wagon陪我過聖誕玩足5日，親戚朋友多？無問題！唔識路去目的地？無問題！平日我最怕七人車大架難操控，但原來Wish仲身手靈活，攝位最醒，穿梭大街小巷，一樣難唔倒我！

左穿右插更快捷

皇冠汽車全力催谷 Wish 2.0七人車，終於有機會試駕 5日睇吓有幾好。適逢派對聚會特別多嘅假期，Wish擁有七座位已經係一大賣點，可以一次過載住六個朋友前往平安夜倒數派對，個個大讚全真皮米白色座椅軟熟舒服，雖然後排空間唔算特別闊落，但兩位大男生坐落去一樣有鬆動。Wish以線條偏扁嘅車身設計帶出動感外形，尺碼跟其他七人車相比，亦係屬較細小輕盈嘅款式，不過坐滿人嘅內櫳並無因此而感到侷促，反而輕巧車身喺2公升雙頂 VVT-i引擎驅動之下，有助我穿梭年尾人車數量倍增嘅銅鑼灣，140匹馬力應付七個成年人重量嘅表現係我意料之外嘅稱職，加埋略帶粗身嘅真皮軚環令操控手感特別好，無論攝位爭路，定係泊勁窄車位同樣得心應手，唯一美中不足就係欠缺咗對我呢啲泊車論盡鬼好有用嘅後泊鏡頭。

■地台特低，老人家小朋友可以上落更方便。

■波棍移上中控台嘅主要目的係防止小朋友碰到。

■座椅變化靈活，前排及中排都可以完全躺下，方便休息。

■尾廂唔算大，不過打開層板仲有一格放細小物件，十分貼心。

SG+幫手搵路搵食

■ SG+導航兼容嘅娛樂系統資訊充足，一按就帶你搵到心水食店。

第2日聖誕節再出發去白石 BBQ，今次同行嘅係有老有嫩嘅屋企人，幸好地台特低嘅Wish實在十分方便老人家上落，再加埋十安全氣囊等多項安全設備令我倍覺放心。對於從來未揸過車去白石嘅我，又點會放過測試埋SG+導航系統嘅準繩度呢。只要輕觸螢光幕設定你想去嘅目的地，導航系統便有中文語音指引方向，準繩度達90%以上，而且操作簡單易用，娛樂系統更內置7萬個興趣點及食肆，方便你於附近搵節目，呢幾日都忍唔住用咗幾次。進入白石途中，我當然亦有把握機會喺高速公路小試+/-轉檔撥片，波箱轉檔反應理想，可惜略嫌得四速有啲唔夠喉。如果你係想慳油唔係講求速度嘅車主，咁就記得啟動 ECO Mode喇，因為呢幾日都有嘗試呢個慳油模式，啟動 ECOMode後只需 7.7L/100公里，關掉後需要 8.4L左右，油耗量分別都唔少，慶幸都係$1/1公里左右啫，十分抵用！

■中控設計簡潔，儲物位多設於車頭。

■雖然尺碼比 Previa同 Alphard細，但內櫳空間一啲唔輸蝕。

卓越版「雙重升級計劃」

■ Wish以 Sports Wagon為名，避震偏硬，起步入彎都更穩定。

可能代理仍然覺得，一直只有推出優越版及豪華版嘅豐田 Wish吸引層面未夠廣，今個星期開始全新增設卓越版，原廠6CD音響系統配備嘅卓越版更以超低價$229,200發售。皇冠更同時推出「雙重升級計劃」，客人可以$9,200優惠價升級原本總值$15,000嘅豪華版設備，包括天窗、轉檔撥片、優質皮軚環及優質皮排檔桿。仲未夠喉？可享用埋第二步升級，只需$7,000，即可擁有價值$13,000嘅優質皮座椅、輕觸式大屏幕音響系統及後泊車鏡頭。令車主可自由選取個人心水及喜好、靈活自由地選購配備。

Wish 2.0 Luxury豪華版