Jaguar XJ 5.0 V8 S/C LWB Supersport　黑豹操 Fit從天降

Jaguar新車發佈會，實在帶畀我好多難忘「第一次」。第一次踏足英國領事館、第一次去記招俾人搜身、第一次近距離睥實熊黛林……今次破天荒獲英國領事館讓出空中花園，再將架 XJ由高空吊入去搞記招，呢架大改款兼操 Fit晒嘅黑豹，絕對攞晒飛！

高清虛擬錶板
Jaguar英式「貴」氣，唔係齋指車價，內櫳豪華設備亦從來未令人失望過。早兩個月廣州車展已跟XJ接觸過，不過太多國內同胞爭相試坐，左摸右搞個內櫳，令當日邂逅毫不浪漫。今次代理安排記者會後畀我靜靜試慢慢嘆，先真真正正感受到XJ喺豪華設備同科技上嘅突破。車廂用大量高級真皮鋪設，雖跟傳統襯以少量木紋飾板，但全部綑以鍍銀飾邊，連幾個冷氣風口都用上銀框，保留傳統優雅感之餘，亦更 Sporty及年輕。中控台 8" TouchScreen具有雙畫面顯示技術，前方乘客同司機大可各取所需，較特別係軚盤後方嘅虛擬錶板，12.3"夠高清，顯示速度、油缸等基本資訊，仲可因應情形而改變，如轉 Sport Mode、 SpeedLimited、車門未關妥、即時耗油量等，呢類虛擬錶板好有機會變成未來高級車系標準配備。

■虛擬錶板尺寸有成12.3"，畫面細緻兼且有好多視覺效果。

■內櫳具強烈高科技感，皮跟木配搭嘅軚環保留積架優雅味道。

■前方擋風玻璃夠大夠 Wide，頂頭又有兩個大天窗，開揚感十足。

■內櫳大尾箱更大， 520公升空間放得落兩個大型行李篋。

英領事館搞記招

■全電鍍網狀鬼面罩仲大過同廠 XKR、 XFR跑車系列。

英國駐香港領事館今次為積架大開方便之門，將其空中花園改裝成戶內場所作發佈會，事前仲要將架XJ裝入貨櫃、從高空吊入花園平台，勞師動眾兼搞足一個禮拜，絕對係香港積架2010年首場重頭戲。首次踏足英國領事館，搜身、過金屬探測器早有心理準備，無所謂，沿路直上空中花園，見到好多典雅英式佈置，到達由空中花園搭建而成嘅發佈會，人山人海逼到幾乎唞唔到氣，原來兩大 Top Model熊黛林同 Ana R.到場齊撐積架，我唔理城嫂條晚裝裙有幾低胸、身上戴住過千萬Graff珠寶，我目的係架 XJ，幾熱幾逼我都要搏命捐埋去。

■黑豹 XJ從貨櫃駛出，唔使着頭燈已有猛獸出籠嘅氣勢。

■動用重型吊雞運架 XJ上金鐘英國領事館空中花園，離遠望到黑底白字 Jaguar Logo，型到爆。

大車鍊贏細車

■難得車頂變矮，車廂依然闊落舒適。

搞到咁大陣仗，皆因 Jaguar呢架全新 XJ都幾革命性，尤其車身外形，可算將 Jaguar大變身，唔再係大家見慣見熟嘅線條。如車頭骨位由「內V」改成直線，令頭冚鼓起，帶出強而有力感覺。兩側頭燈拉長兼微戚，襯埋加大咗嘅鬼面罩同下方氣壩，極有獵豹出動意味。最重要係車頂變得更低矮、再斜傾回車尾，相當之流線，整體頗有收身減磅之效。收完身， XJ操得更 Fit，到港 3款型號均配置最新 5.0L V8引擎，最低入場費近130萬，已畀到你 385匹野獸動力，最勁嗰級 Supersport，更配備 Supercharger機械增壓，跟同門超跑XKR一樣，馬力達到 510匹，積架出名鋼水好兼車身重，近 2噸居然 0-100km/h仲可以做到 4.9秒，鍊贏唔少的骰跑車，黑豹今番操Fit重臨，火氣實在夠晒猛。

■立體豹頭車章相當威猛突出。

■如流水行雲般嘅尾燈夠晒 Sharp。

三版本 XJ五月到港
XJ為 Jaguar最新四門旗艦級車系，英國、歐美等國家同香港都開始接受預訂，據香港代理所講，最快 5月就有現貨到港。除咗入門嘅Luxury同柴油版唔會嚟香港之外，其他三款型號分別為 Premium Luxury、 Portfolio同Supersport，前兩者均採用同一副 5.0LV8偈，只係部份設備如頭燈、後排茶几等有別。至於第三款則為最頂級版，有最多豪華設備，兼且引擎配上 Supercharger。

三版本車價：Premium Luxury$1,298,000Portfolio$1,460,000Supersport$2,098,000