大部份女孩子對 MINI的可愛外形特別情有獨鍾、大部份女孩子揸車都零舍驚青。連掃兩大音樂頒獎禮女新人獎的余翠芝（Chita）亦不例外，考了牌兩年的她，明明嚷着買 MINI係今年目標，偏偏送到面前卻齋坐唔敢揸，估唔到連MINI都恰到佢。
■牛仔布軟篷這隻新色絕對係百搭配襯之選。
澳門土生土長的 Chita， 11年前為理想孤身來港尋夢，幸於4年前遇上了伯樂羅傑承。今年終於吐氣揚眉連掃兩大音樂頒獎典禮的新人獎，更奪得叱咤女新人金獎，「呢幾年一路堅持作歌一路等機會，最開心梗係第一次被取用給 Twins唱的《18變》，幫我打了一支強心針。」自言因為等了多年先有機會出碟，令每次上台都過份緊張，幸好拿了兩個新人獎後又幫她打了第二支強心針定驚。
Chita
不過講到揸車， Chita似乎亦需要一個「駕駛新人獎」為她添自信，「兩年前考完牌諗過買 MINI Cooper同豐田Will，因為比較喜歡外形可愛的車，感覺好卡通好得意。試揸？我好想呀，不過考了牌兩年，都未試過揸車出街，我怕嚇親你。最驚就係Cut線！學車時師傅有次叫我 Cut線，佢狂叫 Cut，我就只顧不停大叫兼手忙腳亂。」
■開篷車的視線夠晒廣闊開揚，其實好適合最怕揸車 Cut線的 Chita。
■自動波牌考了三次才成功的 Chita，樂於只做乘客感受開篷 MINI的樂趣。
■ Smart的大圓儀錶一直吸引年輕人加入 MINI行列。
望坐開篷車同情人吹風
■車門上的大橢圓形飾邊以銀灰色格仔圖案點綴，效果創新。
雖然揸車驚青係女孩子的專利，但 Chita其實又毋須過份怯場，因為備有六前速自動波箱的MINI操控容易，軚感一流以及輕巧的車身都十分適合女孩子駕駛。不過對於要先補鐘才夠膽揸車出街的她， Cooper S的 175匹馬力、240Nm扭力及反應更快的 Sport模式，暫時無用武之地。不停耍手擰頭誓不肯揸的Chita，慶幸還有新色牛仔布篷頂讓她一嚐歡樂，「牛仔布軟篷真係好型，襯埋白色車身的確係絕配，加埋少少電鍍邊點綴就更加搶眼。」之前經常只會坐住經理人那架 Clubman出出入入，今次感受完開篷 MINI後，亦心郁郁想轉投Cabrio懷抱，「開篷車的確幾好，同情人吹吓風一定好浪漫。目標希望今年可以創作多些好歌，有更好表現賺多一點錢買架新車。如可任意配搭顏色，我會揀淺粉藍色車身配白色開篷，不過可能最後又會怕白色篷易變黃同污糟，所以最後到買車時就未必會揀，夢想同現實永遠都係兩回事。唉，做人做音樂都一樣。」唔使咁欷歔，因為 MINI根本就未出她想要的白色軟篷。
MINICooper S Cabrio規格
引擎： 1,598cc直四+Turbo
馬力： 175hp/5,500rpm
扭力：240Nm/1,600-5,000rpm
傳動：六前速自動波，前驅
售價：$366,800
■被冠以女新人王稱號的 Chita喜歡開篷車的優閒感覺，如此嘆咖啡會否有助刺激她的創作靈感呢？ |
發表於 2010-1-14 05:46 AM
| 
發表於 2010-1-14 04:45 PM
|