無做炮灰 30後變寶

呢排講 80後講到鬧哄哄，如果覺得有啲膩，咁轉吓口味又如何，講 30後會唔會老咗啲？無錯，如果講人，30後確係幾老，不過如果係架車，就叫做寶，何況呢架唔係俾人收到密一密當係寶嘅古董車，而係經過戰火洗禮，劫後餘生嘅軍車，計計吓佢有成70幾年歷史，難得佢仲可以陪你上山下海，你話佢幾堅。

呢架「身世」傳奇嘅 1937年產 Kfz2，近年在歐洲汽車收藏家介紹下，被香港軍車收藏家馬大立購回。據講當年產量唔多，而且好多都成為炮灰，家全亞洲就只此一部。車主話架車買返嚟時，後座還裝有一台地對空重機槍，不過香港梗係唔可以入口，重機槍攞走之餘，連槍架都拆埋，費事出街嚇親人。

1.內櫳、座椅以木料為主，十分古典。

最令車主引以為豪的，並唔係罕有，而係呢部軍車性能同四驅技術，令佢嘆為觀止。呢架軍車擁有1.8公升引擎，當年一般車仲係用緊三前速手動波箱時，佢已經係五前速，其餘設備仲有H形鋼型車陣、前置引擎、恒時四驅，其中乾油池設備就是避免軍車爬坡時，斜度太大令偈油傾向一邊，影響引擎運作，技術同現今四驅車絕對有得揮。

2. 73年前已有 5速波箱，厲害！

3.頭燈裝咗管制器，令空中的戰機不易察覺其行蹤。

4.頭冚的子彈孔，見證軍車身經百戰的歷史。

5.軍車連太陽擋都有埋，算係幾細心。

四輪轉向穿梭叢林

6.原來的鋼板車門一早報銷，呢塊係重新裝上。

坐住軍車出街招搖，人生又有幾多次機會。坐喺無遮無擋兼且係木板凳嘅車櫳內，反而有啲坐開篷車 Feel，而且外置引擎散發陣陣暖氣，更有Feel。據講當年德軍就係諗住用呢款車攻打嚴寒的蘇聯，所以特別將引擎外置，作為另類暖氣。撻車之後，由火炭朝着九肚山進發，沿途絕大部份路段都是長命斜，但 Kfz 2表現一啲唔弱，40-50km/h已經相當唔錯，不過架車始終有番咁耐歷史，揸起嚟都唔輕鬆，入波吊極力子自然要考技術，仲要係無風油軚，真係夠手力夠腰力至揸得掂。不過將架車駛入樹叢，先發現佢真正嘅強項。當年為咗保證行軍打仗時軍車可以喺樹林穿梭自如，四輪獨立懸掛系統自然唔簡單，最猛料係四輪獨立轉向，令迴旋半徑不足 3.3米，架車掉頭轉彎，好似玩飄移咁靈活。

身經百戰
Kfz 2屬於當年德國黨衞軍的骷髏頭師無線電指揮車，後來在法國被盟軍俘虜，車門、車身同引擎都中晒子彈，直至六十年代被人喺郊區發現再翻新，之後一直收藏喺法國一間汽車博物館超過三十年。

當年雄姿