割價送朱古力套餐　元宵甜入心

今年因為大年初一而錯過同情人慶祝的機會？唔緊要，趁今日元宵補番數。未諗到送咩？大家不妨考慮一下以朱古力套餐打包上陣的 MINIClubman，首次由頭啡到落尾的獨家配搭，充滿濃情誘惑，係情人都必定甜到入心冧到暈啦。

首配朱古力車頂

■特別喜歡 Clubman右邊多隻門仔令後座乘客上落更方便，免得落車有損儀態。

雖然送朱古力係西式情人節的傳統，但若然元宵佳節有呢部朱古力 MINI Cooper SClubman做禮物，係情人見到都必定甜到入心，照收可也。朱古力的魔力有幾勁？睇舊年年尾為慶祝 50周年而推出的 MINIMAYFAIR就知，由內到外都係朱古力色配搭及裝飾的 MAYFAIR，高貴魅力立刻收大賣特賣之效。乘潮順勢，香港代理立刻有樣學樣為Clubman推出朱古力優惠套餐，希望借機催谷一下一向市場較細的 Clubman。其實多了一個雙門大尾的Clubman按實用程度而言，必定更勝Cooper，不但可以多坐一人，而且尾廂又大、空間更靈活，放雜物、運載大型物件都變得十分方便，從女生愛計算的角度出發，已經先勝一籌，加埋特別為今次朱古力套餐而設的朱古力色車頂，獨特之餘亦可散發更濃烈的朱古力魅力，直頭合晒女生心水。

■軚環、錶板跟一般 Clubman分別不大，可以襯埋啡色仲好。

■名為 English Oak的木紋內櫳配飾十分少見。

■首次配上朱古力色車頂，之前加錢都無。

■啡中帶銀，於陽光底下更見清 。

■黑色八輻式合金輪圈本來係加錢 Options，現在隨朱古力套餐免費送上。

■車尾 C柱位及泵把本來係銀色，今次專登噴埋啡色配番朱古力主題。

套餐大減 6萬幾蚊
話明係套餐，獨家配搭及優惠又何止一個車頂咁小兒科，要製造出原汁原味的效果，代理更十分細心，將原本係銀色的C柱及尾泵把位置，特別噴埋朱古力色，首創由頭啡到落尾的配搭，吸引力又大增。除此之外，呢架 Clubman配備的啡色 MirrorCap、黑色合金輪圈及青蛙頭燈，本來屬加錢的Options之一，今次套餐免費送出。再睇埋內櫳，米色真皮座椅為沉沉的朱古力色調添上一份清新，有啡色木紋中控台及門柄配襯之下，尤其矜貴。計埋內櫳的木紋配飾、黑色車頂及後泊感應器，本來要另加合共$25,988的 Options，一次過送埋畀你。如果選購 Cooper SClubman，更可以免費擁有埋真皮座椅及Xenon頭燈，一次過慳番合共$64,928。呢盒咁抵食大件的朱古力，收嗰個固然開心，送嗰個都感覺有賺，皆大歡喜啦。