Corolla Rumion　自己落手上網揀中古車

日本二手車（中古車）係唔少港人鍾情嘅對象，選擇夠多、賣點獨有係吸引之處。不過呢類車質素及來歷都係一個謎，唔好彩買咗架五勞七傷嘅就真係無仇報。不過家資訊科技發達，自己上網 Check清楚，揀啱心水再運返香港，原來話咁易！

平日不時都會聽到身邊老友講起買二手水貨車嘅慘痛經歷，買咗先發現浸過水、撞過乜都有，聽埋聽埋都替佢哋心酸。點解唔自己親力親為，睇過查過先拍板，就穩陣得多啦！

親自揀深入了解

睇日本二手車，最方便當然係上網，其中「goo-net」係熱門之選，而另一個途徑係透過中介公司提供嘅網站揀選，因為日本有唔少汽車拍賣場只供行內人選購，故此香港人必須由中介公司提供密碼先可入呢啲網站。無論自行上網或經中介公司，都可以對目標車輛作直接了解，因為有關車輛嘅詳盡資料，都列明喺評分紙上。日本嘅二手車場一般都有合資格專業人士評估車輛質素，有關評分紙會隨車輛照片一併公開畀買家參考。由於政府對評分專業人員及業內人士都有嚴密嘅制度監管，出蠱惑嘅機會相對較低。

轉名入口要代勞
買日本中古車要「親自介入」，其實只可停留喺揀車階段，因為揀啱合適車輛後，不但轉名程序會頗為繁複，運輸及入口都涉及種種手續，交託中介車行代勞會係個較明智嘅選擇。中介公司會跟進嘅工作包括為車輛轉名、安排航運，呢個程序大約需30日。車輛到港後，車行會代為報關，到環保署進行廢氣測試，符合要求後便可向運輸署申請牌照。由拍板到心頭好到手，頭頭尾尾會長達兩個月，心急買車嘅人未必適合，當然，一心尋求心頭好嘅車迷，就一定覺得等得有價值。

買 Corolla Rumion夠罕呢部 Corolla Rumion就係Rayman之前親自喺網上搵嘅心頭好，要「隔山買牛」係因為佢要求多多：揀顏色，要有原廠包圍、天窗……結果經中介公司提供嘅拍賣場資料搵到心頭好。「其實喺日本網站自己揀車都唔難，但最緊要有耐性，唔識日文就問吓朋友，好處係搵到好特別嘅款，好似我呢款，全香港只得四部！」

■ Rumion內櫳相當寬敞。

■水貨車導航系統在港不適用，買家要留意。

■尾燈燈泡設計猶如煙花爆開，好特別。

■如加大版 bB嘅 Rumion在港較罕有。

揀車貼士忌來自寒冷地區日本二手車網會區分不同地區的二手車，切忌揀選嚟自嚴寒地方如北海道嘅車輛，因大雪會加快機件損耗，加上當地人會用鹽融雪，鹽份可能造成機件銹蝕。

留意兩驅定四驅日本唔少相同車款即使用同一款偈，都會提供兩驅及四驅版本，如無必要就不必揀四驅版，以免增加耗油。

車價不比車場便宜日本二手車資料齊，不同型號年份成交車價喺網上都可一覽無遺，大家可以先格價。不過由於運費加上種種手續費，甚至質素不同，車主別期望車價會較車場所見嘅便宜。

評分紙必睇位1.車輛登記年月

通常會寫日本天皇年號，此即為平成 20年，即 2008年。

2.行車里數要留意是「マイル」（米）還是「キロ」（公里）。

3.總評分6分顯示該車最高質素， 1分則為最低，而 3至 3.5分則顯示車身有花痕，車櫳或儀錶板等地方都有損耗。接近新車會評為「 S」，「 R」係曾維修，事故車則為「 X」或不作評分。

4.車身花痕及損毀花痕位置及曾維修位置都會喺呢個簡圖上指出，要了解清楚。