Toyota Estima HybridHybrid+電子四驅　彈頭變臉

Estima因外形似足日本子彈火車，故綽號子彈頭，可惜一直得個坐字，無緣親試。今次有幸遇上呢部剛登陸嘅最新 Estima， 09大改款後再Facelift，搭埋 Hybrid偈同電子四驅，更係靈活好力兼環保。

起步更爽

■後排拉起變出闊大尾廂，惟尾門無電子開關。

Estima大改款後，尖長頭燈同似 Prius嘅四方霧燈，真係令外形 In番好多，而且尖頭子彈輪廓不變，無 Alphard咁成熟、咁老細 Feel，Young啲嘅應該好受落。呢幾年試過多款 MPV、 SUV大車，偏偏未有機會一嘗童年日坐夜坐嘅Estima，今日唔再係坐老竇車，可以自己揸旗四圍逛，別有不同感受。Hybrid版同過往汽油版最大分別，係頭驅變成E-Four電子四驅，當然揸呢啲車唔會勁劈，穩穩陣陣咩驅動都係咁上下揸法，不過四個轆都有動力，操控上一定更得心應手。而且有 EBD同ABS兩大護法，安全性滿分。就算揸得急少少，起步同入彎仍然有貨交畀你，尤其 Hybrid最興嘅 Start&Go功能，停車自動熄偈，有四驅幫忙再起步，感覺上更爽，足以順暢銜接到你難以察覺，呢啲都係電摩打獨有優勢。

■車尾設計無乜層次，全靠透明藍尾燈加番唔少分。

■中排座椅大玩伸縮，令內櫳空間激增。

■座椅隱藏變坦蕩蕩載貨位，容量直逼貨 Van。

座椅百變任你點

■停車自動關閉汽油引擎，再起步一樣順暢有力。

今次金國一口氣返咗八人普通版同七人豪華版，我偏偏鍾情價廉實惠嘅普通版，皆因中排並非較局限嘅兩張大班椅，中後排座椅百變度更高。阿媽興高采烈買到平衣櫃，無問題，後排 100%隱藏收納，變成「完美平台」， Call貨 Van都慳番。女友話上山睇日出，OK，大不了半夜揸上太平山，攤平座椅變雙人梳化床，尾座椅背稍微高起，啱啱好變舒適頭枕，大可瞓喺度數住星星等日出，偶爾浪漫都唔係咁慘絕人寰啫。咁大架車，長腿叔叔揸車唔頂腳就梗 o架喇，連 5'10"長腿Model一樣可以喺車櫳典嚟典去，仲讚電子趟門方便女仔，毋須「紮行馬」去拉車門。唯一小投訴係尾門無電子開關或遙控，身材矮細啲可能要跳起先閂到尾門。