德國實試　歐六新貴最乾淨柴油 Passat

口中吞雲吐霧、腳下踩油尾喉狂噴黑煙，十幾二十年前貨車佬絕對人車合一，亦令柴油車嘅「排廢威力」讓人留下深刻印象。今日，實試了福士用上 BlueMotion技術嘅 PassatBlueTDI，同樣係柴油偈，但車喺德國滿佈白雪嘅路上行過，已再找不到半點煙熏痕迹。

■ Wagon版配襯埋行李頂架。

早前日內瓦車展之旅，順道一口氣試晒福士 4架未來重頭新車，繼意大利 Off-road實測 2010大改款Touareg後，緊接嚟到德國禾夫斯堡（ Wolfsburg） VW大本營，親試已在歐洲推出嘅 Passat BlueTDI。打正旗號以Blue命名，全因用上有全球最乾淨柴油引擎美譽嘅 TDI規格，融合獨特 Blue Motion技術，令廢氣排放低至 137g/km（以Sedan為例），足夠符合 2014年才生效嘅歐盟六期排廢標準。禾夫斯堡落足幾日雪，為四周靚景錦上添花。唔跟 GPS，隨心所欲揸住Passat，去到一處類似錦鏽花園嘅獨立屋住宅區，唔單止引擎聲浪無破壞附近寧靜，剷上大片雪白花園，除留下胎痕外，雖然尾喉在冒煙，不過只係溫差帶嚟嘅水氣，絕無半點黑煙噴落白雪上。喺獨立平房周圍兜，都唔怕嘈到人、煙到人，柴油車已去到拍住混能咁 Clean嘅境界。

■特意換上雪胎，走在雪上都無咁跣。

■頭尾燈未有大改動，保留 Passat風格。

Turbo絕配 DSG

■錶板唔算大，勝在行車資訊齊備同清晰。

德國無乜迂迴山路，不過沿途穿過勁多迴旋處，初段就感受到 VW另一王牌裝備 DSG波箱嘅優點，234波不停上上落落，反應快行車順暢，基本上你只須專心控好油門就得。有埋+/-波，玩得唔好嘥，開始上大直路，大可靠高轉數引發Turbo爆炸力。喺香港試 Passat，你會話好定好舒服，但 Turbo一旦嚟料，驀然驚覺Passat衝刺力原來都幾可觀。內櫳方面，保持番一貫豪華水準，半皮半絨座椅，擺落Passat度出奇地合拍，整個中控台鋪設金屬面板，令車廂不致過度老成持重。測試車為旅行版，同行幾個人加幾個大袋，完全發揮Wagon大尾廂好處，鍾情四門房車嘅亦毋須擔心，呢款 Passat一樣有 Sedan版，而且有機會繼 AudiQ7後，另一款登陸香港嘅柴油私家車。