輕量版 Alphard8座平8萬

話豐田 Alphard係 MPV之王，應該無人反對，感覺就好似所有大戶人家都總有一部傍身看門口。市場近乎飽和？咁又未必！代理全新引入嘅 8座版Alphard，雖然馬力細咗，但座位多咗，而且價錢仲平咗一大截。呢部猶如少年版嘅 Alphard加入MPV戰圈，必定可以吸引更多年輕家庭入場，將 Alphard用家嘅數量推上另一高峯。

2.4公升引擎

■桃木皮波棍、獨立冷氣，豪氣依然。

雄霸 MPV市場多年嘅Alphard，憑巨無霸車身所提供嘅特大內櫳空間，贏盡不少家庭歡心。豪華及安全配備、舒適嘅座駕享受，更贏得陸上行宮美譽。水貨車行都爭相引入，層出不窮嘅豪華改裝、極誇包圍、配按摩椅、重型 Subwoofer音響等統統試過，直頭變陸上皇宮。不過今次代理偏偏唱反調，反璞歸真首次引入8座位版本，多咗個位但就比 7座 Alphard 350（動感版$572,840）平超過 8萬元。價錢親民嘅主因莫過於引擎容積減少，由350嘅 3.5公升 V6引擎變為 2.4公升直四引擎，馬力雖然只得170匹，試車當日一行四人，上斜未見吃力，加上有七速無段變速波箱，行車轉檔嘅暢順表現無損駕駛呢部輕量版Alphard四出郊遊嘅樂趣。坦白講，車身重量接近 2,000kg嘅巨無霸若然要坐滿 8個人，可能就要手動加減波幫幫手。

■啡紅色桃木真皮內櫳可換米色，更襯白色車身。

■第三排座椅有簡易輕拉式摺合功能，加上車身高，令尾廂空間大得驚人。

■ Optitron儀錶板嘅兩個大金屬圈上面有發光數字，設計立體。

三大禮免費升級

■ 8座版本來只跟絲絨椅，家會免費升格做皮椅。

8座Alphard雖然馬力較小，但外形上跟350幾乎完全一樣，巨型頭燈及鬼面罩襯出充滿霸氣嘅車頭、引入更多自然光嘅雙天窗、上落更方便嘅遙控電動雙趟門等一一俱備。 11個安全氣囊、ABS防鎖死煞車系統等安全配備亦跟350睇齊。至於內櫳方面，兩者設計大致一樣，大堆豪華配備如桃木皮襯飾、三區域自動恒溫冷氣、後泊車鏡頭、營造劇院氣氛嘅LED車頂燈等，都完全保留 Alphard嘅豪華氣派。惟獨係由於 7座變 8座嘅關係，中排兩張Ottoman獨立座椅被抽起，改為一排過三座椅設計。雖然少了點氣派，但中排椅背可作 6/4摺合，令新車於空間靈活度方面取勝。加埋代理推出三大Options，買車即送 SG+導航/娛樂系統， 350豪華版至有嘅頂置 10吋LCD顯示屏及優質皮座椅，仲唔心郁？話埋你知佢高性能、低油耗嘅引擎更符合政府環保私家車標準，可享高達5萬元稅務優惠，好爸爸再無藉口唔添新車啦。