Previa子彈變七速省油15%

MPV選擇多，講款式豪華，佢未及 Alphard般頂級；計價錢實惠至平，可以揀 Wish。但級數介乎兩者中間嘅豐田 Previa偏偏可以大受歡迎，正因唔少車主認為呢部中庸之選已有足夠豪華氣派應付日常需要。受寵嘅威力本已非同小可嘅子彈頭， 2010年版仲要換埋個七速無段變速波箱，加速爽快利落嘅表現再添幾分殺傷力，要連任學校門口七人車霸王嘅地位變得更易如反掌。

提升實用賣點

■米白色真皮內櫳有淺色桃木飾點綴，配搭新鮮柔和。

買得七人車，屋企唔係有老人家就係有小朋友，最印象深刻莫過於返學放學時間經過豪宅區學校門口，擠滿一大堆七人車嘅場面實在好壯觀。每次經過亦會不期然細數邊一款七人車係 Number One受歡迎之選，九龍塘、北角寶馬山等區，答案都係外號「大霸王」嘅 Previa。咁受爸爸媽媽歡迎，或多或少係因 Previa嘅舒適及實用程度有一定級數，好似名為 7． 4． 7嘅七座豪華版，中排真皮獨立座椅軟熟舒適，更有腳靠承托，坐得特別嘆。加上識得緊貼潮流逐步改款令豪華形象升級，如 09年版增添智能車匙，離遠一按都可打開兩側電趟門及尾門，令小朋友上落更方便，仲有一按式電動尾排摺椅，輕鬆一按，收摺後座連小朋友都做得到。而 10年版，更有 SG+導航及娛樂音響系統幫手帶路、 70,000個「興趣點」教你搵食搵節目，代理更醒目送上後泊鏡頭及原廠 DVD影音系統連 10吋 LCD顯示屏，小朋友放學可以即刻睇碟鬆一鬆，全部都係顯豪華又實用之作。

■七座較八座貴，呢張連腳靠嘅中排椅座當然係主因。

■沿用舊有 2.4公升引擎，而新的七前速波箱則提升燃油效益。

加料

送上原本屬 Options嘅原廠 DVD影音系統，中排頂置 10吋 LCD顯示屏。

■ 2010年版 Previa，波箱四速變七速，用加減波轉檔都更好玩。

SG+導航及娛樂音響系統備有 70,000個「興趣點」，唔擔心無節目。

20年人氣高企
由 1990年推出第一代 Previa至今剛好 20年，咁多年來可以一直保持人氣高企，感覺長青嘅子彈頭造型亦應記一功。即使舊年小改款時稍作修改，換上充滿動感嘅 V形鬼面罩、尖長設計嘅頭燈，亦無影響多年不變嘅子彈頭標記，只係在視覺效果上增強動感。買得七人車都係求實用，速度有幾快好多時都係其次，相信廠方亦深明此道，原有嘅 3.5公升及 2.4公升引擎所輸出嘅 275匹馬力及 170匹馬力，其實足以滿足大部份用家，所以 10年版新款所變嘅只係波箱，而唔係夾硬加大引擎推高車價硬銷馬力咁不切實際。日本廠方將 2.4公升引擎版本嘅四前速自動波改進為七前速無段變速自動波箱，利用智能控制皮帶推動嘅波箱轉波更快更爽，大大提升行車暢順感，上落大斜路時優點更加明顯，不但強化七人車應有嘅舒適，亦令一向軚感輕操控易嘅 Previa更易揸。而且呢個七速波箱仲可以進一步提升燃油效益減低排放，減低油耗最高達 15%，亦同時符合 EFV政府環保汽油私家車稅務寬減優惠，呢一點先係最貼合一眾爸媽嘅歡心。　