Lotus Exige Cup 260超輕賽版蓮花合法飄街

外形充滿戰鬥格嘅蓮花 Lotus每次出場必能搶盡收視，何況今次呢部最新到港嘅，係 2010年落場版 Exige Cup 260，廠方將 Exige GT3賽車配備應用到街車上，再用上舊年成功減磅嘅 Cup 260車身，比起 Exige S輕 38kg，全車重量只得 890kg，連女士都可以輕易推郁！

42kg下壓力全新尾翼

■內櫳屬一貫簡約嘅賽車格局，真皮波棍已經係感覺較豪氣嘅地方。

未正式到港已經引來一大班車迷於網上熱烈討論，久候多時， 2010年版 Lotus Exige Cup 260終於到港現真身，引人注目嘅誇張線條配合螢光黃車身，份外矚目。呢部被車迷譽為擁有賽車規格嘅街車，戰鬥味濃，全因佢係 Exige GT3賽車嘅街道版化身，廠方刻意將 GT3賽車配件套落 Exige Cup 260車上，令佢進一步貼近賽道規格，又得到歐美及亞洲各大主要市場認可合法於街道上行走。諗起一架落場賽車可於青馬大橋上飛馳，夠晒滿足感。而新版 Cup 260跟 GT3外觀上最大分別在於車尾嘅碳纖維尾翼，換上曾於 07年日內瓦車展亮相嘅 GT3街道版概念車嘅尾翼款式，比起 09年版嘅 Cup 260，呢隻無烤漆碳纖維尾翼升高了 46mm、加闊了 181mm及向後移了 61mm，設計不單止可以減低風阻，而且更可於車速 160km/h時，提供 42kg下壓力，增強高速時穩定性。

■車尾有充滿設計感嘅「 Cup 260」標誌響朵。

■連軟弱無力嘅 Alia都可以推郁部蓮花， 890kg車重果然好輕。

890kg輕飄飄

偏實嘅賽車軚感唔係咁多女士會適應。

總覺得 Cup 260用上全新尾翼增強下壓力，或多或少跟其超輕車身有關， Exige本身已經用超輕嘅強化玻璃纖維車身，追加了大量碳纖配件如車頂生風口、中控台、兩側生風口及門檻等經已減磅 12kg，再將車身各部份輕量化如用上 Motorsport電池、鋁合金機械增壓管道及超輕五輻式鍛造輪圈等又減 22kg，最後飛走埋不必要嘅地毯、倒後鏡等共 4kg配件，比起 Exige S總共輕足 38kg，車重只得 890kg。有得必有失，要將車身輕量化，恍如落場版賽車嘅 Cup 260實在難求十分舒適，不過作為蓮花車主飛馳嘅速度感至重要。沿用早前亮相、全港僅此一部暗黑蓮花嘅引擎， 1.8公升配備 Supercharged機械增壓，可以輸出 260匹馬力及 236Nm扭力， 0-100km/h只需 4.1秒。此外減輕車身重量嘅最大好處當然係減低油耗，每一百公里只需 8.5公升汽油，每公里$1.2都唔使（以每公升$14計算），點飄都唔肉赤啦。