2010 KIA Morning 1.1 EX Sport package升呢 Morning全餐唔使10萬平通街

nt1972

韓國 KIA車仔 Morning轉新裝，車頭、車尾大換Look，加埋內櫳升級，轉過晒款式同用料，呢個新嘅升呢「早晨全餐」都咪話唔夠豐富，最筍係聽聞升呢新車預售價仲可能比舊款平幾千銀，附送埋呢個加料「甜品」仲唔日日 Good Morning？

內外變型 Look

■全車一體式大包圍，型仔。

今次搶先試嘅呢部 2010年 KIAMorning屬於頂級版，加入咗全套運動配件，又型又具強烈運動感。全新小改款最盞鬼係喺鬼面罩下面加條紅邊，感覺就好似會笑嘅小車，配合埋帶勁嘅霧燈及一體式大包圍，整體感覺更型格。車尾同樣養眼，最正必數全新黑底雙圓尾燈組，從後望過去，一洗以往Cute爆可愛感覺，再配黑飾邊及新款尾泵把，整體 Man唔少之餘，更具性能車風格，而掀背式尾門上落物品更容易。吸引視線嘅竟然仲有油缸蓋，Stylish得來更和胎軨設計呼應，好玩。內櫳亦放咗唔少心思，最搶眼莫過於用上皮、絨雙料兼全綑上螢光黃邊線嘅座椅，用色唔多反而更突出內櫳型格。用料手工亦較以往細緻，軚環、儀錶板都齊齊轉款變型。



       
■內櫳設計以黑色為主調。

新包裝

■頭泵把頭唇轉新裝，加埋條紅飾邊，好似笑緊。


■加入新式尾泵把及黑邊飾。


■造型特別嘅油缸蓋同胎軨的造型襯到絕。


■黑底嘅設計亦見於車尾，尾燈組因而更顯特色。

預售價再平幾千

■十萬唔使掀背車仔都可以摺叠後排，增加置物空間。

引擎稍作微調，機械數字不變，實際操控起來，反應又好似靈敏好多，就連轉新裝嘅金屬油門及迫力腳踏都反應快咗。以1.1L車仔而言，起步加速感覺係夠力，而且座位高、視野廣，於路面行走時睇得夠全面，平時日常代步絕對夠用，惟 Kick-down反應稍慢，相信Full-load時要有飆唔起嘅心理準備。當然，對 65ps嘅車仔唔應該有唔合理嘅期望，其實呢個新Morning「全餐」本身已經十足驚喜，估唔到仲有埋「甜品」。最 Sweet嘅莫過於價錢，本來唔使十萬銀一部已經好抵玩，至巴閉係全新車小改款Morning預售價聽聞會比舊款 Morning EX Sportpackage版仲要平幾千，舊款車價現時係$98,928，仲有得平？慳荷包就梗係連心都甜埋啦！

新內涵

■皮、絨雙料座椅，加上螢光黃飾邊，型仔！


■包上黑皮嘅軚環加入鮮黃縫線，勁搶。


■全新儀錶板加入紅色密集線條，更見活潑。


■唔使自己換，原廠就已經係金屬踏板組。


■用上更具安全性嘅蛇仔波箱。

規格
引擎： 1,086cc直四
馬力： 65ps/5,500rpm
扭力： 97Nm/2,800rpm
傳動：四前速自動波
售價：待定

搶先報：發現全新 Sorento
拍攝當日仲發現陳列室有一部新 Sorento，定位係 Crossover SUV城市多用途車， 2.4L七座 SUV兼具四驅功能，輸出馬力175匹，新車屬第二代大改款，實用性及豪華感都較第一代出色。呢部車於今年四月先喺首爾車展首次亮相，話咁快就已經喺香港登場，據講車價由$179,800起。


■ 2010年 Sorento，$179,800起。


■內裝齊料兼有豪華感，二十萬唔使，都咪話唔筍！

lukky1010

多谢楼主分享