公仔箱論壇 - Powered by Discuz! Board

標題: Toyota Previa 2.4 豪華版體貼大霸王 [打印本頁]

作者: nt1972 時間: 2009-3-13 07:12 AM 標題: Toyota Previa 2.4 豪華版體貼大霸王

豐田 Previa 新 Look 登場，呢部人氣 MPV 一向巨型有氣勢，「大霸王」外號絕非浪得虛名，不過今次新形象，竟然溫柔體貼升級，貼心設備大提升，不過，性能上就加入咗 3.5 公升超勁版，更有霸王氣概！

瀟灑一按式
小改款 Previa 喺外觀同內裝上都進行了一系列修改，外觀上最明顯莫過於頭尾燈設計及線條，全新鬼面罩以及更立體尾燈。內裝方面就一定要數全新智能車匙以及按鈕或啓動系統，仲有同樣係一按式電動尾排摺椅。用過免匙系統嘅車迷都會認同，單係袋住條匙，上落鎖車簡易又方便，最重要係，㩒一㩒即開即鎖真係好瀟灑！

■ 免匙及按鈕式啓動系統，操作簡便又瀟灑。

■ 車廂設計變動不大，主要係換上唔同飾料。

■ 一按式後排電動摺叠椅，又型又易搞。

越變越惡
當年俗稱大霸王七座 Previa 上場真係大受用家歡迎，登場至今已經有好長一段日子，不時執執佢，緊貼潮流，先係保持人氣嘅要訣，呢點 Previa 就梗係醒啦。

09Previa 今次屬小改登場，設計配備上添加新鮮感之餘，最冧係加入咗唔少細緻體貼裝置。而車系亦加入咗新成員： 3.5 公升引擎版，配合全新 V6 VVT-i 偈，馬力較 2.4 版本多超過 100 匹，達 275 匹，都咪話唔誇張。而今次拍攝用車則屬 2.4 公升豪華版，直四引擎搭配四前速自動波連加減模式，馬力輸出最高達 170 匹，扭力於轉數值達 4,000 轉時亦能全數輸出 224Nm ，性能直逼豐田旗下頂級版豪華 MPV 王Alphard 呢！

操控上，無論係行貨 Previa 抑或係日版 Estima 都好，個人覺得揸上手都覺得軚感頗輕，呢點可能受絕大部份女士歡迎，不過未知係咪我試車試得多，開始偏愛更實在嘅軚感及實在嘅駕駛感覺。新車依然保有上一代般大嘅軚尺， U-turn 轉彎爽快利落，夠晒疏肝。