1,340kg最輕林寶收身碳

男人夢寐以求嘅神級超跑林寶堅尼，點樣可以力保王者地位？最簡單最直接嘅方法莫過於減磅加速，換上大量碳纖裝潢嘅全新細牛 Gallardo LP570-4 Superleggera，成功以 1,340kg車重問鼎林寶最輕之位，廠方再將馬力微微提升至 570匹， 0至 100公里只需 3.4秒嘅瘋狂表現，唔揸又點對得住自己。

靠碳纖減磅 70kg

■後擋風玻璃改用聚碳酸酯，無損美觀度。

近年努力瘦身嘅林寶堅尼，之前已經幫過不同型號戰車減磅，今次輪到細牛 Gallardo LP560-4，大刀闊斧減去 70公斤肥肉後變為新一代 Gallardo LP570-4 Superleggera， Superleggera喺意大利文代表「超輕」意思，名副其實係林寶最輕嘅公路跑車。 LP570-4嘅線條、外形都跟上一代分別不大，尺碼無縮水，但就加咗大量碳纖配件，好似中控台、桶椅、尾翼、擾流器及尾冚等，淨係碳纖已經幫佢減咗 40kg車重。玩碳纖向來係林寶嘅強項，今次打造一架碳纖無處不在嘅細牛，內斂不浮誇嘅碳纖鋪排配襯喺白色車身，實在恰到好處，有型指數爆晒燈。至於其餘嗰 30kg，就有賴聚碳酸酯製成嘅後擋風玻璃及側車窗、 19吋鋁製鍛造輪圈及粉飾內櫳嘅 Alcantara物料等，達成車重馬力比降至 2.35kg/hp呢個目標。

■好在唔會為咗減磅而犧牲冷氣及音響，仲有電窗。

■紅色箭嘴尾燈標記，喺白色車身襯托底下係最突出。

■ Alcantara比真皮更輕，亦更有質感。

■ 19吋鋁合金鍛軨，更輕更硬。

油耗排放減低 20.5%
呢部小碳牛跟上一代一樣搭配咗一台 5.2升 V10引擎，但經廠方調校後微升 10匹至 570匹，扭力達 540Nm，最高車速每小時 325公里嘅表現，膽量稍為細啲都唔敢駕馭。而引擎以汽油直噴式推動嘅技術，大大提升咗燃油效率，無論耗油量定係二氧化碳排量都比上一代減少 20.5%，綜合油耗只需 13.5l/100km，揸得斯文啲，分分鐘可以更低，一改超跑一定燒銀紙嘅作風。一向覺得係男人之驅嘅林寶，從來未諗過有機會喺公路上試一轉，但與大牛相比，已屬輕巧嘅 Gallardo亦引來不少女車主垂青，全因操控、轉彎已經靈活得多，而且六前速 e-gear+/-波箱簡單易用，只要輕輕一啪軚盤右邊嘅升波撥片已經自動入波，仲有 ESP電子穩定系統、限滑差速器等協助，女士揸林寶好快變成等閒事。