L200 Sportero小改 粗獷型男谷溫柔

nt1972

車唔一定要夠豪夠惡至令人望而生畏，見到大大份嘅 Pick Up（農夫車），都好有壓迫感，有點像粗獷味十足嘅男人，講細心一定無份。不過見到經過小改款嘅三菱 L200之後，竟連細微嘅駕駛享受都兼顧到，原來，「粗獷型男」都可以外剛內柔。

換配襯新鮮
講到農夫車，一直都係小眾玩意，不過總有捧場客，試諗吓，車重近三噸，有個巨型尾斗，如果要用電油，條數真係幾襟計，用柴油驅動嘅農夫車，自然有佢吸引之處。咁仲唔止，車櫳設計媲美豪華房車，電動真皮座椅，恒溫冷氣，天窗等，一應俱全，既有舒適享受，又可以帶嚟豪邁駕駛感。不過始終 L200推出咗一段時間，其間不時會配襯不同配件保持新鮮感，老實講，對貪新鮮嘅車主嚟講，可能會覺得有啲悶。聽講廠方已為 L200推出 Facelifted版，而且即將登場。新 Look未曾亮相，好彩代理醒目推出 L200 Sportero小改款醒醒神。雖然外形上，流線車身及標準裝備如前置霧燈、電鍍側鏡、雙色外拋輸拱及特大腳踏等，已經成為 L200 Sportero嘅標誌，故此只在 17吋合金輪圈上做手腳，稍為改改款，令整體感覺更為剛強。

       
■真皮座椅、鋪排時尚嘅中控台，豪房享受。

       
■巨型擋風配大天窗，減工作味增休閒感。

Sporty贏 SUV
       
■四輪驅動，穩打穩紮，賣另類運動感。

要改，唔喺粗枝大葉上，反而從細眉細眼處着手，內櫳才是重點。中控台基本設施不變，反而中控台下方，竟意外地發現左右兩旁嘅座椅發熱按鈕，雖然近日香港熱氣逼人，相信呢幾個月這配套亦無用武之地，但諗到喺冷冰冰嘅冬天，一坐上座椅暖笠笠嘅感覺，真係夠晒體貼。據代理指，今次小改版本亦有喺增加操控按鈕、提升方便度上着墨，手掣旁就設有叉電按鈕，亦有按鈕遙距操控車廂與車斗之間玻璃窗嘅開關。講到性能， L200 Sportero絕對唔係有姿勢無實際之流，作為四驅車，走崎嶇路面嘅能力當然屬基本，當然始終唔可以當正佢係一般 SUV，可以陪你攀越 60度大斜坡，而且有個大尾斗，亦減低靈活性，不過佢都夠晒 Sporty，大尾斗放單車、滑水板甚至獨木舟一樣得，粗獷運動感比周街都係嘅 SUV有過之而無不及。

       
■全新打造 17吋合金軨稍稍帶嚟新鮮感。

       
■車斗可配上密斗，實用性大增。


■跑車款嘅三環式電鍍錶板。

       
■農夫車都裝上暖椅，體貼得叫人意外。

       
■電鍍與黑色配襯嘅側鏡，頗有型格。

       
■科幻味藍光按鈕，在硬朗感中加點玩味。



引擎： 2.477cc直四柴油 Turbo
馬力： 136ps/3,500rpm
扭力： 32.0kg-m/2,000rpm
傳動：四前速自動波/四驅
售價：$329,000（自動版）$289,000（手波版）

車仔仔

thank you