Sera廿年　 Keep住姣

憑住奪目過人嘅玻璃蝴蝶車門，不時出現喺報章雜誌。今日，我們讓呢部豐田 Sera亮相，然後，係又一次嘅驚艷！令人不解，係因為佢已年屆二十，絕對可列入老車之列，但不僅有本事依然一身亮麗充滿時代感，而且更越變越靚。車癡主人公開愛車「長青」之謎：就係齋錫唔揸！

■車頭包圍是為愛車度身訂做嘅自製產品。

以「平民鷗翼」響朵嘅豐田 Sera，曾經有唔少 Fans，甚至有發燒友組成車會。時至今日，愛得執着嘅人似乎所餘無幾，好彩仲搵到當年車會嘅聯絡人阿民，對心頭好 Sera，佢依然珍而重之。睇真部車，竟然又靚咗，證明佢「無變心」啦！呢個「愛情故事」 05年就開始，阿民用四萬蚊買咗呢部 90年出廠、殘舊不堪嘅 Sera，之後使喺佢身上嘅錢，就遠遠超過買入時嘅車價。

1.咁型嘅座椅屬原裝配套，只係將絲絨重新拉上白皮。

單門設計嘅 Sera一般被認為係擁有鷗翼車門，正確來說應該係蝴蝶式車門，而 Sera嘅車門由玻璃製造，伸延至車頂，車門連車頂揭起，氣勢不凡。揭背式車尾同樣透光度十足，置身其中，簡直有水晶車嘅效果。不過，話晒年紀唔細，要有個 Young Look，點都要執一執，粉藍色車身，再加全車都裝上度身訂做嘅包圍裙腳，即時充滿年輕跑格。 Sera曾出產過包圍配件，但十多年後亦早已過時，於是阿民就聯同做車身纖維裝置嘅老友，自行設計包圍，實行重新打造。

2. 小巧嘅白色軚環，並非原裝，但刻意 Keep住古典味。

3. 中控台重新噴上白色，感覺簇新。

■與別不同嘅頂置尾翼，配玻璃揭背，一樣奪目。

■車主阿民話做足維修，較易保持靚樣。

■玻璃蝴蝶式車門，係 Sera搶收視嘅撒手鐧。

講到最潮，就要睇埋內櫳啦，因為再經「整容」，本來嘅深色絲絨座椅換上白色真皮，中控台以白色襯粉藍色，加上水晶裝飾配搭，好有時代感，全無「老態」。最叫人意外係揭開頭冚，副偈嘅乾淨程度簡直新嘅一樣。為一部老爺車費盡心思，阿民絕對係車癡。同阿民喺西貢兜咗轉，姣到爆嘅車身顏色早已成為一街焦點，泊低停車揭開車門更加不得了。後生仔、阿叔阿嬸到實，注目度威過唔少名車，呢種虛榮感絕對係用心機換番嚟。「要照顧老人家梗要花啲心思，平時我唔多捨得揸出街，不過唔可以擺低佢喺車房就算，要佢行得走得，平時都要幫佢換吓偈油、風隔同油隔等。」至於車身仍可保時閃到反光，亦有秘訣，就係個多月就要幫佢打蠟，避免污迹滲入車漆。由於大部份適合 Sera嘅零件逐步停產，近年阿民更開始陸續搜羅相關零件，以防「老人家」跪低後，無適合零件替換。

爛車變靚 Look