要講經典四驅越野車，點會漏得三菱嘅 Pajero，不過即使係王牌，睇得耐都悶悶哋，尤其喺香港開越野車，就梗係型格行先，所以 Pajero都係時候要裝吓身。由 2010年頂級版 Pajero Super Exceed親身示範，車櫳豪華設施升級嘅 Pajero，再配上裝身套件，即時增添粗獷味及霸氣。
型仔配件上身
■頂級版 Pajero，除了剛陽，也有幾分豪氣。
Pajero今次主要係喺外觀上大變身，如果你硬要講係換湯不換藥，都錯唔晒，不過當你見到變咗身嘅 Pajero，就知道有時換湯不換藥都可以耳目一新。四驅車講究粗獷味，老實講， Pajero喺車型設計方面都已經做到足，車身寬闊令整個車型顯得強勁紮實，剛強味十足，再加 Options，可以話係錦上添花。雖然 Pajero出名車身又大又高，一身山頭霸王格局，但同樣可能令人產生笨重嘅感覺，裝身套件中嘅車尾頂置擾流器，令整個車型更趨流線，此外為排氣喉加上粗大喉套，亦同樣令車型更添跑格。有時睇車總不能過於粗枝大葉，否則你錯過很多精妙之處，唔信？睇埋車門個開關把手就知道。電鍍把手自然係例牌貨，難得係把手底托嘅豉油碟都係電鍍，咁至叫細心。不過呢次裝身行動，講型講格之餘，都有細心嘅一面。買得越野車，總係會希望一嘗上山下海嘅興奮，泥擋雨擋呢啲配件點少得？至於頂架，喺香港，使用率應該唔算高，但喺郊外，可以爬上去欣賞一下風景都幾爽，更何況買得越野車，唔少車主都諗住衝出香港啦，要去冒險，真係點少得佢。
■頂置定風翼，令車形更添流線。
■排氣喉加粗喉套，是否令你誤以為跑車。
■電鍍「豉油碟」，夠晒搶眼。
■波浪設計嘅中控及錶板感覺活潑。
粗獷豪華混合體
■ Pajero車身偏高，有腳踏方便上落亦更添越野 Feel。
今次代理安排 2010年頂級版 Pajero Super Exceed演繹呢套變身配備，簡直絕配。呢個最豪版本，五門七座設計，除了配上全車真皮座椅、多聲道音響、 17吋合金輪圈等，還要在車櫳配上桃木裝飾，展現粗獷與豪華嘅混合體。作為越野車，性能又豈能忽視， Pajero Super Exceed配備 3.8公升 V6引擎，擁有 252匹馬力及 34.5kgm扭力，而且與其他 Pajero一樣，配備 SS4-II四驅系統，有 2H、 4H、 4HLc及 4LLc四種行駛模式供選擇，其中 4H模式最適用於濕滑路面，系統會自行調節前後車輪嘅扭力分佈，達至更佳抓地力。在崎嶇山路上可採用 4HLc， 4LLc為雪地模式，不過一般香港路面，採用 2H模式已經足夠有餘。
■桃木配飾，係 Pajero Super Exceed至有。
■後排摺叠後完全收藏地台下，空間大增。
■寬大天窗，郊野睇星點少得佢。
Pajero Super Exceed規格
引擎： 3.8公升 V6馬力： 252ps/6,000rpm
扭力： 34.5kg-m/2,750rpm
傳動： 5前速加減自動波
售價：$479,900全套裝身
配件：$15,231
■粗氣喉、尾翼、頂架，裝身配件令車尾更具型格。 |
發表於 2010-5-6 06:41 AM
| 