杜汶澤憨Look做乖仔轉性撐環保

儘管暫時人氣不復當年嘅杜汶澤無一日幾組戲在身，亦難以令人相信佢應承接受訪問及試車會如此爽快。興致勃勃打算借架甚麼超跑佢試，經理人卻話：「佢一定要試環保車！」 OK，立壞心腸認為佢係想刻意建立乖仔形象，扮愛環保唔愛快。估唔到跌倒轉性嘅杜汶澤現在做每一件事都以佢口中嘅「大棚福利」行先，為環保謀福祉，「總叫做對地球有啲貢獻先啦。」

輕狂戰績
老婆架車改咗入彎極穩定嘅彈弓避震都照翻，連汽車特技人都甘拜下風。「我遇到羅禮賢，佢話想知我究竟點翻車。我話你寸我呀？佢好認真，話呢類咁難翻嘅車佢真係唔識翻，萬一導演要求起上嚟就麻煩，叫我教吓佢喎，真吹脹。」

乖人語錄

「你睇吓早排啲空氣污染指數，過五百呀，大佬！個地球就快完蛋喇！環保呢啲大棚福利自然要知啦，幫手宣傳吓環保車，叫做對地球有啲貢獻先啦。」

憑《女王辦公室》中肥仔秘書 Leven一角，杜汶澤人氣急遽回升，大起大跌嘅人生卻令佢自言凡事已看化，訪問期間不停唔該前唔該後態度謙厚，實在令人刮目相看。「人老喇！心態上都變得成熟咗好多，有時真係唔到你唔熟 o架，有乜話紅唔紅吖，有工開、可以做啲對大家有益嘅嘢，已經係家嘅目標。好似近年嘅電影來來去都係啲三四億嘅合拍片，平日度埋啲地道爛 Gag咪趁幫 TVB拍劇當免費娛樂派街囉，最緊要大家開心。」呢位熟男就連揀車心態亦隨之而變，堅持影環保車就係佢所講嘅「對大家有益」。「其實係吳彥祖介紹我用環保車嘅，佢知我搬咗入元朗住得遠，問我有冇上網睇過 greencar.com，我先發現原來有咁多咁正嘅環保車。加上家日日對住啲樹木，個人都身心舒暢咗，更加覺得珍惜環境好重要。」聲言撐環保車唔係得個講字，亦本來打算買豐田 Prius，「我見到 Prius出咗事，幾傷心呀！同老婆睇好晒，諗住買 o架喇！豐田肯投放咁多資源研發環保車，實在係好事，無奈家要再睇定少少。」

■ HYBRID呢個混能標記逐步讓大眾接受，阿澤亦認同混能車係大勢所趨。

■大讚 RX450h嘅油電混合引擎着車時夠晒靜，「呢啲咪係環保車嘅好處囉。」

「很難一下子改變」有炒車、停牌前科，自言炒車後揸車已經收斂，但其實近排亦曾巧遇過杜汶澤揸住架豐田 Hilux SURF「瘋」馳電掣，心中確充滿疑問：混能車真係可以滿足到佢？「一個人揸住唔同車嘅時候就有唔同揸法 o架啦，最重要係真正嘅切膚之痛係電油呀，大佬！以前食米唔知價，從來唔知入幾多錢油，家就改為老婆出糧畀我每個月食飯同入油，嘩，住遠咗真係用多好多油呀！咁混能車相對真係可以慳油好多！」專誠借夠豪華又夠台型嘅 LEXUS RX450h混能車畀佢試，佢邊揸邊讚：「嘩！都幾好力喎！呢架車最好嘅地方係可以一步步嚟，要有力時有力，又可以等人慢慢認識一下用電車嘅享受，逐步接觸環保車。要啲用開大馬力車嘅人突然跳到去用最慳油嘅車，始終好難立刻適應，正如人好難一下子學好一樣！」一言驚醒，我不禁在想，阿澤嘅改變究竟孰真孰假，不過深思一層，演技又好，真心又好，起碼佢確實抽咗個幾鐘同我唱好環保車，嘗試走出改變嘅第一步。