熱血 CR-Z　最有跑味混能車

日內瓦車展爆咗架 Hybrid法拉利出嚟，足證混能唔再得個慳字，令超級跑車都要趕潮流。 Honda再度挑豐田Prius機，有齊混能慳油靜音優點外，賣相卻充滿 Honda最煞食嘅熱血 Design。除咗拉利，相信最具跑 Feel嘅Hybrid車非佢莫屬。

Prius大量回收，我在意嘅並非豐田窘境，而係 Prius實在太紅太強，一有問題就惹嚟極大迴響。當頭起梗有大量對手等住挑機，今年陸續有日產Leaf、本田 Fit Hybrid上場，但 2010年率先上陣嘅，就有 Honda呢架 CR-Z。過往同廠嘅 InsightHybrid曾跟 Prius正面對撼，可惜只算無功而回，今仗大幅改頭換臉，Honda擺出最耍家嘅熱血設計；低矮流線車身，雙門跑車格局，加埋特大頭燈同鬼面罩，勁有跑車Feel，望多兩望丹田真係有股熱氣慢慢升上嚟，誓要狠踩一番！車頂線條流麗地收至後方，而車尾玩番 Insight、Prius般「倔尾龍」設計，但勝在更立體更有層次感。

■ CR-Z配 i-VTEC，表現更勝一架 1.5L車仔。

■ Honda喺日內瓦車展力谷 CR-Z，北美及歐洲亦隨即發售。

■原廠用上觀感不俗的 16"胎軨。

■車頂為大面積玻璃，增加開揚感。

+/-波箱好玩有力

■波棍手感一流，但要玩+/-波請移玉手至軚盤。

試車路程唔算遠，灣仔至石澳來回，但有足夠直路同山路，試起圍扭力同波箱反應。最令人驚喜者，係電摩打雖只有 14匹輸出， CR-Z主打仍係i-VTEC汽油引擎，但表現實在唔似一架1.5L車仔，配埋軚盤+/-拖低波，起步扭力強大得可以用彈射嚟形容，頭中段表現令人滿意。真係要彈嘅，係大油高轉起步時，汽油引擎全力運作，噪音會稍為提高，不過我就當敲起戰鼓，準備享受出征嘅駕駛快感。玩完一輪，靜心觀察內櫳設備。雙門格局幾得人歡心，前排亦好鬆動舒服，不過由於採用 2＋2座椅設計，尾排真係幾 Dog Seat，靚女 Alia唔算高，一樣勁頂頭槌，幸好上落車算方便，加番唔少分。