Audi A5 Sportback 2.0 TFSI quattro2變4進化

要講潮語，近年車壇都有，就係人人口中總會講吓嘅「仿跑」，係房跑至真。事實有眼你睇，幾辣嘅跑車都加埋豪華房車元素，潮流似乎已經表明，單純嘅Coupe，已經唔夠，好似 Audi呢架 A5，明明係 Coupe，但又推出Sportback版，將架車由兩門加到四門，結果……修長車身加流線設計，無論係跑車定房車擁躉，都會為佢傾倒。

高調彩藍
舊年Porsche推出 Panamera，似乎已經話畀大家知跑車已經進入另一時代。作為大車廠， Audi又點會執輸，舊年 A5Sportback喺歐洲亮相已令人眼前一亮，踏入一月，終於喺香港現身。作為今年頭炮，實力當然唔講得笑， A5Sportback最煞食嘅，非外形莫屬。車身前半部保留 A5Coupe嘅基本設計，大改重點是後半部，斜背嘅車尾設計，修長嘅線條及低車身，優雅之餘，依然保留其跑味。單睇外形，視覺享受已經一流，今次畀傳媒試揸嘅係彩藍色 A5Sportback，記者對彩藍有固執嘅偏愛，事關無論喺陽光定燈光下都特別搶眼，玩房跑當然要高調，如果唔係鬼知你夠潮。豪華房跑要入型入格，份量自然唔嘢少，車長 4.7米，軸距達 2.8米，較 A5增加 59毫米，不過車身反而降低 36毫米，只有 1.39米，令駕駛時更有貼地感覺。

1.側鏡加設指揮燈。

2.鴨尾式定風翼，低調得來有型。

3.向後傾嘅車頂，令天窗面積稍為狹窄。

■超大行李廂，實用性超強。

抵買名牌＋高科技
講到係房跑，當然係集跑車同房車優點於一身，實用性自然比跑車強，為保留線條美， A5Sportback採用斜背式設計，但完全無損後座空間感，至少高佬做乘客，腳部伸展位置絕對足夠，反而頭頂就可能有點壓迫感。焦點仲有個480公升容量嘅尾廂，今次 Audi更特別設計到能將後座椅背倒放，即時將行李廂容量提升至 980公升，都咪話唔驚人。 A5Sportback喺歐洲推出時，足足有 6款唔同嘅電油同柴油引擎，全部採用燃油直噴技術，不過今次搶先亮相嘅，係 2公升 TESIquattro版。咪睇佢只得 2公升，但已經擁有211匹馬力，由坐上駕駛席一刻，半桶式跑車座椅即時有令人投入跑車感覺，雖然起步時一度擔心龐大車身會削弱駕駛跑車嘅樂趣，但開車後才知道這些擔心多餘，喺 7前速 S tronic雙離合器波箱同埋 Audi王牌 quattro四驅系統配合下，加速同轉波反應爽快利落，仲有個Differential運動化差速器，在高速入彎時不斷監控前後軸扭力，平衡重心。最緊要係唔使五十萬買齊名牌、駕駛享受同高科技，相比其他動輒過百萬嘅房跑，你話抵唔抵。