十年一遇　白武士

呢排「日本製」金漆招牌出現信心危機，日本車行都幾閉翳！不過，近月 Yamaha旗下的一款暢銷車AX適逢十周年，過往功績不少的它一直累積「粉絲」甚多，如今紀念版強化成「白武士」 WHITEMAX，外形Fresh又實用，相信可為近期勁頹嘅日本貨一振聲威！

千輛限定

■黑白色靚 Seat，同普通版單色唔同。

Well，柴九哥話齋「人生有幾個十年？」一部優良名駒能馳騁車壇十年，都唔係一件 Easy Job！十年前T-MAX之所以能夠喺芸芸眾「羊」中爆出，皆因佢設計夠創新，除咗係第一台用上四衝程水冷直二偈嘅綿羊外，更係顛覆傳統嘅後置引擎設計，反將樞軸點設在引擎後方，解決多年來重心偏後嘅問題，如此這般行車就更暢順，發揮更上一層樓。今次特別版為佢加冕，車廠亦特意隆重其事，將WHITEMAX的限售日期設定至本年 6月，而且只會發售 1,000台。

■儲物小格也用上鋁金屬色點綴。

■前制動是 267mm雙碟配四活塞卡鉗。

升呢碳纖
過往用家揀 T-MAX原因有二，一係貪佢靚仔，二係鍾意佢夠力兼實用。今次推出嘅WHITEMAX，當然繼承呢兩個優良基因。外形上除咗恰如其名用上白色車身外，細心留意佢跟普通版亦好大分別。其中最為車迷受落嘅係換上碳纖錶面板，成架車升呢變 Grand。另外，雙色輪圈設計、白色外圈三圓錶、黑白雙色 T-MAX壓花字樣靚 Seat，以及加上小隔熱罩的尾喉，都係WHITEMAX專有特徵。為了凸顯其紀念版的身份，車身多處也加上「 WHITEMAX 10thAnniversary」的專屬紀念牌及字樣，就連街外人門外漢都一眼睇出呢架係正嘢！

■特別版尾喉細心地裝上隔熱罩，以防你玉腿辣親！

■碳纖面板加上白色外圈三圓錶。一個字，正！

實用依舊
雖然 WHITEMAX在馬力上沒有顯著提升，不過優越駕駛感仍然牽動人心。最高的 43.5ps動力以及4.6kg-m最大扭力，足夠你縱橫香港，高速公路嘍囉都難以匹敵。 267mm雙碟配四活塞制動卡鉗，成為了高速行駛的安全後盾，急煞無難度！另外，WHITEMAX作為經典豪華羊，強勁儲物功能亦是賣點之一，不論是車頭的小型儲物格，還是座椅下的大型儲物箱，足可讓你放置地圖以及乘客頭盔，令你揸得舒舒服服又夠酷！