消防 Look　暴走拖車

拖車呢類功能重於一切嘅車種，最緊要係架生夠齊。有事發生時第一時間趕到，要睇靚車，都唔係拋緊錨時，心急如焚呢種心情睇啦！偏偏呢位仁兄懶理你係咪有心情欣賞佢架車，自己鍾意就得，所以先至有呢架日本消防車同暴走貨車混合體嘅拖車喺路面出現。

周身日本味
連拖車都要介紹？無錯，因為你根本唔可以將佢當做一架拖車咁簡單，點解咁講？自細喺我認知裏面，拖車總係污糟邋遢，車櫳總係亂七八糟。但偏偏呢架就日日出街都閃閃令，車身嘅閃燈多到七彩，任何人行過，目光總係俾佢搶走。喺車版裏面，介紹車總係要講埋車種，不過呢架車係咩車種似乎唔多重要，重要嘅係，車主喺架車玩啲乜。原本白色車身噴晒鮮紅色，搶眼唔在講，車頭同側鏡都換晒可以當鏡照嘅電鍍裝飾，望落好似有啲熟口熟面，係咪似消防車呢？原來車主就係以日本消防車做藍本，大改特改。不過消防車可以玩嘅花臣當然唔多，結果就混合埋日本暴走貨車格局喺裏面，由腳踏至車身裙腳位置，都裝晒閃燈，救車如救人，梗係搶眼啲好。加埋胎軨同胎冚，就知車主對架車有幾咁講究。至於車斗，首先吸引眾人目光，非啤牌圖案莫屬，雖然唔知拖車同啤牌有乜關係，但最緊要型啫。以為車斗梗係擺吊架同工具嘅地方，可以改嘅，多極有限，車主卻出人意表咁令你知道，燈號都可以咁搶。車斗上嘅走馬燈，加埋兩盞射燈，超級有型，至於LED組合尾燈，自然唔少得。

■同日本消防車（左），真係幾似。

1.車頭大量電鍍組合，夠閃夠搶，當鏡照都得。

2.仿貨船嘅氣笛聲，一鳴驚人。

3.用水晶砌成公司 Logo。

4.布料款嘅沙板，專程喺日本訂返嚟。

搶埋警察目光

5.水晶波棍，搶晒鏡。

車櫳一樣浮誇但就風格一變，係暴走貨車格局。由中控台至車櫳頂都包上色調低沉嘅花布料，帶出一點Cool味，加埋連扶手嘅梳化式座椅、車櫳閃燈、日式小燈箱、水晶波棍同一啲吊飾小擺設，成架日式暴走車味道出晒嚟。不過最吸引我反而係可以響氣笛，拉一拉駕駛座旁嘅吊繩，車頂嘅氣笛隨即猶如貨船般爆出響亮笛聲，令人精神一振。不過車主講明，呢個氣笛甚少代替響按，免得嚇怕路人。作為搵食車，司機喺車上嘅時間隨時多過喺屋企，車櫳要睇得又瞓得唔在講，耳仔都要有啲享受，加埋一套靚音響咁先至夠完美。要玩另類，當然要付出代價，錢係其中之一，呢部車車齡一年多，車價都係二十六萬幾，但花喺改裝已經近十萬，係咪值得真係見仁見智。咁仲未止，你架車邊行邊閃，吸引路人目光之餘，連警察目光都唔覺意搶埋過嚟，車主就試過因為之前車頭加咗黃色閃燈，最終被人抄牌罰款。所以先旨聲明，要玩搶眼，真係要清楚法例至好，如果唔係裝咗上去又要拆番落嚟，盞掃興。