高皓正唐寧× Mercedes-Benz C280 Estate 秒速點止 18米

nt1972

相約舞台劇《秒速 18米》嘅男女主角高皓正及唐寧試 C280Estate，本以為男發偉論，女純屬陪影相，點知搶住試嘅係唐寧，高皓正連旅行車嘅頂架用途都胡裏胡塗。角色大兜亂，幸好揸車有板有眼嘅唐寧做司機，亦無損佢哋感受呢架 3,000cc嘅 C280絕對唔止 18米嘅秒速。

大尾廂　實用兼有型
車主有兩種，第一種係買架車返嚟作交通工具方便出入，第二種係喜歡駕駛感覺，享受駕車樂趣，見到新車會搶住試揸嘅人。於舞台劇《秒速18米》扮演洪松蔭嘅高皓正騎單車愛唔愛快就唔知，但就肯定佢係第一種人。剛買了一架全新Prius混能車代步，就知佢對車係講求實際，「係呀！五年保用真係好吸引，又慳油，真係兩星期先入一次油咋。」至於另一主角，跟阿正合演情侶嘅唐寧，反而見到車形龐大嘅 C280 Estate旅行車即刻流晒口水，「我鍾意啲好Man嘅車，越大架越啱我，之前我都係揸旅行車，好鍾意旅行車個大尾廂，好型！」 C280呢個尾廂絕對唔係得個樣，只要摺合後排座椅，更可高達1,500公升容量，夠晒實用，真係單車都放得落幾部。好多人喜歡旅行車除了因為外形討好，亦唔少得令整體感覺更Sporty嘅頂架，唐寧話呢個亦係佢最鍾意旅行車嘅地方。不過阿正竟然問：「其實呢兩條嘢有咩用o架呢？」眼見呢位高大猛男原來對車嘅了解如此淺薄，大家都估到，佢試車意欲唔會大……


■上到車，齊齊充滿好奇狂 㩒掣搵高科技配備。


■兩個百厭星硬銷 C280連水撥都靚過人。

3公升引擎　有力又夠靜

■兩個都 Buy容量達 1,500公升嘅尾廂。

不過唐寧此時立刻眼仔睩睩咁望住我：「係咪真係可以試吓 o架？」千祈唔好睇小唐寧細細粒、斯斯文，試起 3公升引擎、 0-100km/hr只需7.5秒嘅 C280時，都會踩到盡感受一下 231匹馬力嘅澎湃輸出，「嘩！好爽好順呀！之前我未揸過咁大cc嘅車，原來真係咁有力量感。雖然我從來唔鍾意辣車，好怕嘈，但 C280有馬力得來又夠晒靜，好正！早年唔係太鍾意Benz旅行車，覺得佢車頭同車尾唔太夾，頭太斯文尾太Sporty。不過呢部新一代改良後嘅款式，感覺流線好多，型好多，有機會我一定會買番旅行車。」


■車頂上兩條頂架係旅行車最具魅力嘅地方之一。


■兩位車主都認為真皮多功能軚環係揀車嘅一大誘因。



規格
引擎： 2,996cc V6 DOHC
馬力： 231hp/6,000rpm
扭力： 300Nm/2,500-5,000rpm
傳動： 7G-Tronic半自動波，後輪驅動
售價：$575,500


■唐寧跟高皓正都係十年牌車主，不過講到對車嘅熟悉，反而係唐寧。