30萬豪改 Hummer　轟爆飛鵝山

好多車主不惜工本，將靚車加裝發燒級 Hi-Fi，見得最多係寶馬同波子，但揸搵食車幾十年嘅黃先生，卻獨愛軍車之王 Hummer H3，最近更豪花30萬，裝足 7個靚聲擴音機，音量只扭到一半，已足以響震飛鵝山山頭！

發燒靚聲　如情人撒嬌
專改裝發燒音響嘅 Ricky打畀我，話有個客改咗 30萬 Hi-Fi，問我有冇興趣影。30萬唔係小數目，但喺音響界只算濕濕碎，「唔係喎，佢裝落架 Hummer H3度喎！」裝落軍車之王度咁得意？嗱嗱聲仆落觀塘Galaxy度。一見架 H3，全身電鍍 Parts，幾乎閃到我睇唔到嘢，但都不及車內全套橙色 Hi-Fi咁特別， Galaxy將兩側A柱「偷窿」，藏入高、中音靚聲喇叭，再改噴鮮橙色，令到深沉全黑內櫳即時 Young晒。由於最着重人聲嘅喇叭設於A柱，跟前座乘客同司機耳仔位極接近，奇怪係聲音兜口兜面撲埋嚟，都唔會有嘈到頭痛嘅感覺，高級喇叭絕對顯露身價，歌聲跟樂器定位清晰，尤其播靚聲CD，時而溫柔、時而憂怨，彷彿情人喺耳邊撒嬌，令人陶醉。

Ricky

■改裝音響九成以上玩藍光，難得 H3用上橙光，一樣咁靚。

■ 7個後置擴音機放晒喺尾箱，兩邊有 12"特大低音喇叭。

■兩側 A柱改噴橙色及裝上高中音喇叭，聽靚歌夠直接。

■機頭用上先鋒 ODR，車主讚佢分析力高。

7個擴音　響徹山頭
前方三路喇叭夠靚夠細緻，但講力量感，點都要靠尾箱嗰堆擴音機。總數 7個 AMP駁埋一齊，其中有啲機種仲係香港都買唔到，如 Audison HR100，加埋輸出功率達到 3,000w，絕對唔講得笑。喺飛鵝山頂實測，播首黑人炸機Rap歌，真係轟到老遠都聽到，一熄機仲聽到回音響徹山頭，勁！ HummerH3市價約$700,000，加埋改裝費都唔嘢少，其實車主黃先生唔係大有錢佬，只係揸咗幾十年貨車嘅司機，玩到咁大，只因對H3同靚聲太着迷，「我得一架H3，去街代步乜都靠佢，鍾意佢有型有款，馬力扭力好足夠，香港無路難到佢，最重要係少有，唔會周街都係。而且我不嬲都好鍾意聽歌，尤其大陸歌手嘅歌，佢哋嘅聲線好柔和好甜，遲啲等我呢套新音響慢慢咁逐步開聲，效果真係令人好期待。」