LS460L添高科技　智啟富貴門

唔少人都愛將汽車品牌分等級，一級名車多屬歐洲品牌，不過以超豪貴氣、配備超班打響名堂嘅日牌 Lexus有極速趕上之勢。LS460L豪房就係當中佼佼者，2010年版更係擺明要一年豪過一年，多項高科技配備及完美飛機椅等落足本。一打開呢扇百萬富貴門，絕對豪氣逼人。

頭等享受

■車尾迫力燈換上更搶眼嘅橫紋設計。

汽車類別之中，俗稱為「老細車」嘅，都係一啲頂級豪華房車，單睇斯文沉實嘅LS460L外形，可能你會覺得，跟一般豪華房車分別唔大，但只要一打開車門，一股富貴氣派立刻撲面而來。米白真皮超闊落車櫳、貴氣的桃木配飾、後座按摩椅連 Ottoman電動腳墊，有邊個敢話呢部唔係「老細車」。2010年版本更參考飛機椅設計，將頭枕改良成為創意蝴蝶形軟枕，加埋座椅嗰種軟熟舒服，仲有不同力度調校嘅按摩，實在勝過坐飛機頭等。對住重新編位嘅DVD影視屏幕，聽住 Mark Levinson環迴音響嘅靚音色，享受近乎完美。其實新版本LS460L嘅改動又何止咁少，外形設計亦花過心思進行微調，好似側鏡上嘅全新金屬箭頭形指揮燈、稍作改動嘅鬼面罩，仲有頭尾燈更有線條美嘅鋪排，呢一點一滴都令 LS460L變得更 Trendy。

加豪身價升
日圓高企，大部份新版車型售價都有加無減。睇番LS460L，雖然身價都有所提升，但加豪之餘更加入了兩項全新高科技配備，令你畀得心服口服。好似全線凌志車系都配備嘅全新聲音導航系統，可以更聰明醒目咁為車主帶路，令平日少駕車嘅老細級都可以親身享受駕駛快感。仲有智能自動泊車系統幫手，唔止 S位，連L位都搞得掂，即使泊車技巧麻麻哋，都唔怕出洋相。不過要摸熟呢兩項智能系統，就似乎需要多點時間。另一個角度睇，車價貴幾萬元之後，除咗豪升級，仲多添咗高科技配備畀我慢慢玩，總叫值得啦。