TVR Tuscan Speed 6　玲瓏浮誇

男人睇車當睇女，流線車身固然重要，但浮誇出位對男人嚟講絕對係多多益善，出街搶眼等於幫自己爭回不少面子。好似 TVR架Tuscan咁，應圓地方就圓，應凸嘅又夠凸，拍攝時 Model瞓上玲瓏浮凸嘅車頭，兩者「S」完美配合，曲線美感出晒嚟，就算見慣大場面，都不期然怦然心動。

落車開篷

■篷頂要自己郁手拆，不過唔算重，基本上一條友都搞得掂。

乜嘢係「手動式」硬頂開篷？ Tuscan Speed 6又讓你開開眼界，開篷，就係走落車將篷頂同車尾玻璃拆落嚟，再擺晒落尾箱！不過都好過以前啲舊款 SL同 MX-5咁頂篷拆咗無位跟車，要安置喺車房，出街前要決定「今日開唔開篷好呢？」

波浪車頭勁搶眼
TVR旗下車系一貫浮誇，總有本事令人「嘩嘩聲」。可惜香港無代理，港人要親身體驗，睇嚟都只有打賽車 Game。今日都係偶然之下，先得以一睹TVR嘅真身。落到名車滙，全場過百林寶波子都唔及 TVR架 TuscanSpeed6搶眼，低矮車身配特長車頭，全身充滿大弧度波浪曲線，加埋左右各三盞大中細圓頭燈，難得在全車圓潤仍然具有超級跑車風範。最獨特之處在於長長鬼面罩，入氣位承接圓形概念，一個個窿似足鬚刨頭，真係有本事剃盡各式古怪騎呢車種嘅眼眉。最緊要 TuscanSpeed6喺香港夠罕有，開埋篷喺銅鑼灣塞吓燈位，真係全街哄動。雖然呢架係 2000年二手車，但以放盤價 34萬有找嚟計，搶眼程度絕對值回票價。

■開篷後好有 90's英式跑車風味。

■三幅式賽車軚盤，背後個錶板着燈後，又係型到爆。

無輔助系統考你技術
九年前嘅 TuscanSpeed6個款睇落一啲都唔過時，不過骨子裏賣嘅係賽車原始風味，唔係個個舞得掂。操控有難度並非指佢五速棍波，以及重極力子跑車特色，相反油門、腳掣等，都用上 Racing嘅直立式，易收易放，最考人功夫係無晒時興嘅電子輔助設備，莫講話循迹系統、電子油門，連ABS同風油軚都欠奉，經驗少啲嘅，揸住佢分分鐘俾佢玩番轉頭。就好似西部牛仔享受馴服蠻牛嘅滿足感。