前驅豪艦　城市破浪

Audi德文 Slogan「 Vorsprung durch Technik」意謂突破科技， Audi最近引入全新型號 A8L，就重新演繹Slogan，換上前驅及新偈嘅頂級旗艦房車提供嘅係「 Sportiest Saloon in the luxuryclass」，想像得到巨大身軀擁有強悍性能加上高度操控，遊走市區，如享受乘風破浪般嘅運動快感。豪住破浪，係大街小巷熱到不得了嘅熱浪！

■ A8L採用全新 3.2公升配 Multitronic自動波箱。

■ A8L始終係房車，尾箱大得誇張。

巨型超靈活
欣賞 Audi嗰份有自己一套、嘗試同創新嘅態度。月初推出全新引擎嘅頂級旗艦房車都唔係一味齋Sell豪華高科技，成百萬嘅房車，可以想像絕對係豪華老闆車啦，咁仲有咩特別呢？有，就係部車揸起嚟又或者坐起嚟都超靈活。嗰份感覺似足以Skimboard滑浪，想像你係一個滑浪高手，操控住一塊輕身到不得了嘅滑浪板，有速度、快感，最重要係，超爽！全新 A8L，叫得L長陣版，軸距有成 3,074mm，造就車身長達 5,192mm，可想而知內櫳空間有幾闊落，想加咩豪華設備都得喇。真皮豪華 ComfortSeat，備有 10角度電動調校及隱藏式座墊伸展同埋電動主動安全頭枕，四區恒溫冷氣、桃木裝飾方向盤及內飾、電動太陽擋、招牌MMI多媒體系統等等，豪華配備一應俱全。

■老闆級梗係有氣派，車門開出角度差不多成 90度。

■ Comfort Seat附有十角度調校。

全鋁架具速度感
咁大部咪十足划艇？划艇吃力好多，操控 A8L就瀟灑得多，全新鋁合金車架減低引擎負荷同時提升操控、速度及安全性。 3.2公升引擎，輸出馬力260匹，改搭七前速 Multitronic波箱及前驅系統，操控順暢容易，就連後排都加入全新 RemoteControl，操控咩？當然係招牌嘅 MMI系統，無論調校車身懸掛抑或娛樂音樂系統都「不求人」。炎炎夏日，揸住全新A8L就好似喺熱浪中操控住豪華滑浪板，遊走城市街道揮灑自如，唔要司機自己揸，絕對係個人化享受，當然，講身份，只做乘客亦無妨，過百萬嘅豪華加穩定舒適嘅行車，齋坐，都係另一種享受嚟！