JVC無添加芒原色撼 BRAVIA

係咪鮮艷奪目就叫靚？各人定義唔同，所以眾牌子生產嘅 LCD TV，都有佢獨特「癖好」！例如有玩家覺得 Samsung偏藍、Philips偏黃，究竟邊一種受歡迎啲，各花入各眼；至於何謂逼真，就有客觀標準喇！ JVC首度推出鑑賞級LCD芒，賣點係採用高還原色彩技術，逼真成點，你比較吓兩幅畫面對照咪知囉！

■厚度為 4.25cm，走去同 LED TV比絕對唔稱得上薄。

52種畫質微調
睇過大牌子 LCDTV示範，係咪覺得草地特別綠、天空特別藍呢？據JVC方面所講，原來真實環境並非想像般理想，只係廠商為求畫面更入眼，於是喺用色上加重料，令眼睛睇落去特別靚、色彩特別鮮艷。咁算唔算用眼睛欺騙自己，各人睇法唔同，但呢款 JVC 42WX70就講明以還原真實色彩做主打，例如喺最高級別標準嘅 Adobe RGB色域，佢覆蓋率就達到96%，意思係差不多呈現番真實環境嘅色彩；而用嚟表達數碼單反機相片嘅 sRGB色域，更 100%全完覆蓋！

■提供詳細微調項目，不過有啲人見到就頭痛。

係咪需要追求到咁真實，因口味而異，但機內已配置勁詳細嘅畫質微調功能，如色調、色彩、色域、色差補正以及雜訊抑制等，多達 52種！如果想簡單啲，亦提供 6個預設模式，包括專業睇相嘅 Photo PRO或戲院 Theater模式。

喇叭隨時拆走

■喇叭位屬於獨立設計，就算拆走咗都唔影響外觀。

有冇留意一點，查實 42WX70定位為一部鑑賞級 LCD顯示屏。吓？唔能夠睇電視？大家又唔使擔心，雖則質素勁到可俾一般專業人士用嚟執相，但JVC為求令呢款機更平民化，刻意將佢打造成 LCD TV嘅感覺，黑色磨砂外框，配備 42"Size之餘，還加入熱感應操控鍵，最特別係機身下方有一條可拆式喇叭，嫌音量輸入得 20W唔夠炸的話，可隨意將佢拆走，再自行搭配色差或者HDMI音響設備；惟一可惜不設光纖輸出，否則效果更理想。

■配 3組 HDMI，駁機頂盒、音響、碟機勉強夠用。

另外，機身不設 TV Tuner，想睇高清節目就要喺機背插番條 HDMI接駁機頂盒喇！

現場大比試

雖然 BRAVIA以色水自然出晒名，但對比 JVC，毛髮層次稍為遜色，細紋佔優，不會過份偏色。

鬥透光， JVC顯示衣服紋理最細膩，至於 SONY則明顯睇見白色煙霧，各有優劣。

RGB色域高，用 PhotoShop執相就可顯出 JVC新芒功力，還原逼真度高，而 BRAVIA皮膚顏色偏紅。

Profile
尺寸： 42"解像度： 1,920× 1,080對比度： 50,000： 1光亮度： 450cd/m2反應時間： 6.5ms色域： sRGB100%/ Adobe 96%端子： 3組 HDMI、色差、 AV、 PC體積： 990× 599.7× 42.5mm重量：12kg（不含揚聲器）