Blu-ray無線 7.1　大包圍

自從 Blu-ray殺入香港家庭，人人中毒！只係深淺程度不一，輕則一萬幾千買部 1080p電視，重則砌埋擴音機兼喇叭，搞到幾萬蚊落樓！今次SONY繼續向發燒友「落毒」，最新 BDV-E800除咗具備無線傳送音效功能，還支援7.1聲道環迴立體聲，試睇《量子殺機》一幕，勁到以為入錯戲院！

另購後中置玩 7.1
E800雖然隨機只係跟兩隻前置、一隻中置以及兩隻後置喇叭，但如果想體驗吓何謂 7.1，查實機內已提供模擬 7.1聲道系統，即係話，只需要用到5.1喇叭，已經 Feel到加埋兩隻後中置喇叭後，嗰種模擬 7.1效果！當然，單靠模擬未必人人受落，如果真係想玩齊7隻環繞喇叭，可額外選購多一對後中置喇叭，具備S-AIR無線功能，盛惠$1,280。如果你唔認同自己經已中咗毒，梗係一試無妨。自行配搭擴音機同喇叭，如牌子、輸出功率，甚至擺放位置等，均屬一門高深學問。唔想學？唔緊要，事關玩 E800就唔使理咁多，佢最大好處係夠晒 User-friendly，機內特別配置數碼音場調校（DCAC）功能，只要㩒個掣，等多 30秒，電腦就會自行計算喇叭位置，再模擬出合乎你心水嘅音場效果，啱晒玩家庭影院音響嘅入門初哥！

■加埋呢 Set後中置喇叭，就可以做到真正 7.1。

■試播《量子殺機》及劉華演唱會，前者表現勁好多！

■設定無線傳輸音效之前，記得插上傳送裝置。

■數碼音場調校對入門玩家幫助好大。

■引擎聲由左至右走，好動感！

■馬匹狂奔一幕試出臨場感。

片車聲效最震撼
呢套 7.1聲效有幾正，實在好難形容，不過記招當日， SONY就將 E800圍繞在約400呎嘅辦公室一部份範圍之內，俾在場記者試聽。感受最深應該係《量子殺機》一幕，占士邦駕駛住跑車同敵人周旋，無論係引擎聲抑或碰撞路壆時所發出嘅音效，都可謂相當震撼；另外， E800總輸出功率多達 1,000瓦，就算大如近千呎嘅家居環境，相信亦可應付自如。

Details Snap

■屋企用緊 Bravia？碟機 Remote就可兩邊控制晒。

■光纖同軸、色差以及 HDMI端子統統齊備。

■遙控無電？機身配置基本播放掣，頂住先無問題！

Profile

主要功能： S-AIR無線傳送技術、 S-Master數碼放大器、數碼音場調校總功率： 1,000W端子： HDMI、色差、光纖播放媒介：BD/DVD音效： LPCM 2聲道、 Dolby Digital、 DTS體積： 430× 93× 430mm重量： 5.4kg查詢：SONY（ 2345 2966）