人氣王蔣嘉琦終於停賽復出，今期應會成為市場焦點之一，不過按照統計數字，谷草一哩目前仍屬蔣小妹弱項，至今跑了21次只得三亞兩季，今日其胯下三匹同程座騎第四場「珍珠旺」、第六場「盈豐駿駒」及第八場「僥倖」，近仗均交過理想表現指數，估計會有一定票數支持，如不相信蔣嘉琦會突然「開竅」的話，向同場其他馬匹打主意的話，應有機會賺水。
不少有睇統計的人，也會察覺到蔣嘉琦跑短途頗有揸拿，1000米尤其厲害，今季谷草及沙田同程合共跑了33次，取得九W七P，要再追小妮子，還是先向1000及1200米埋手較有把握，其中第七場「旅遊多寶」剛仗在谷草最短途直領到底，難得這匹連雷神騎也嫌重口難留的馬，在蔣小妹胯下韁口變得順滑，段段快開下仍能令良好實力指標「實力飛駒」未能埋身，既然苗禮德肯花個半月替「旅遊多寶」等路程，加上近期苗廐連捷馬比比皆是，這匹新勝馬不失為值得信賴的技術性熱門。
第十場嘉琦的「開心神駒」近三次出賽拉士均有不錯追勢，尤其上仗配韋達角逐谷草1200米，末段騎得論盡仍造22秒58跑第五更有睇頭，但總嫌頭段不夠快腳，今次改配蔣嘉琦僅負112磅，有助這匹細馬頭段不再執輸，有力與「旅遊多寶」構成一口「苗蔣配」孖寶。 |
發表於 2016-6-9 02:48 AM
| 
