荷蘭另類跑王　起雙飛衝上雲霄

話Spyker跑車夠另類，全因身價三百幾萬，卻不會貫滿全身高科技，駕駛樂趣請憑自己技術發揮出嚟。難得 CarPro話畀架右軚版我揸出街過吓癮，二話不說將雙翼側門升起，準備撻匙殺上飛鵝山，不期然湧起衝上雲霄嘅氣概。

似揸方程式

■用上真正跑車桶椅，承托力絕對足夠。

做咗車版咁耐，靚車揸過唔少，不過最難忘始終係荷蘭造飛機起家嘅 Spyker，年頭影過兩次 C8 Spyder，一次喺Showroom影硬照，一次跟李英健 MoriningDrive，兩次接觸都好表面，今次有機會實試，仲要係右軚版，就近近哋由觀塘出發，直踩飛鵝山兜番轉。鬧市中行車預咗又塞又慢，慶幸極力子無想像中咁重，吊住油門同極力子唔似以前啲重型跑車咁辛苦。唔知係咪新車關係，反而轉波需要出啲力，支連動式波棍都幾實，揸到後期隻手真係會攰，少少偷懶下，轉波頻率明顯無咁密。 Spyker以前有 F1車隊，理所當然注入不少引擎及 Racing元素落 C8Spyder度，李英健話「車性」玩中尾段，沿途無直路畀我爆，不過齋玩頭段起圍扭力，已經深深感受到副 4.2V8偈有幾勁。一直上山，車速唔快、彎路不多時用 3波上仍然大把喺手，啪落2波玩推背一樣得，電腦介入唔多，畀幾多油就去幾多，扭幾多軚就轉幾多，感受到好 Pure嘅駕駛樂趣。最正係車身低矮貼地，加上採用F1橫式懸掛，入彎時勁有方程式Feel，後驅車完全無甩尾憂慮。上到山頂無樹遮擋，和暖陽光照遍整個山頭，遙望蔚藍天空，剎那間真像揸飛機般有衝上雲霄嘅感覺，只嘆自己無跟住變成馬德鐘或「唔唱 K」。

■連動式 6速棍波，轉波時下方條金屬柱會跟住郁。

■用上大量啪掣，開車似揸飛機係咁啪掣。

■電腦介入唔多，行車暢唔暢順睇個人修為，反而更有駕駛樂趣。

■飛鵝山彎多路窄，勝在車身低矮，唔難 Handle。

飛機工藝點襯都靚
C8Spyder由全鋁合金打造，車殼焗漆的確比一般跑車更實更靚，加上試車用上銀底珍珠白，陽光普照下閃閃生輝，比之前喺室內見到嘅流露更多高級車應有貴氣。廠方強調人手裝嵌，除引擎外，咩都任你配搭，嫌紅黑跑 Feel皮櫳太大路，大不了咪再襯過，反正車廂內充斥飛機式金屬面板同啪掣，點襯都咁靚。