不愧最大進步馬！喪加54分後 二班孭頂磅仍輕勝

02754566

放頭馬在這天谷草日馬一直捱打，由第一場跑到第九場為止，未試過有馬匹可以帶放勝出。卒之寶物沉歸底，第十場二班1200米，蘇偉賢馬房四歲新西蘭自購新馬精英「發盈喜」，在潘頓胯下輕鬆放到，單Win及組合獨贏A1，分別派51及23.5元。
「發盈喜」上季一戰谷草於四班跑尾二，不過此駒今季大幅進步，今次於二班雖以1號馬身份掛頭牌，負重至133頂磅及排9檔欠佳，但仍能以高速一放到底，彈甩對手個半身位掄元。
1號馬「發盈喜」取得本身谷戰第一Win之餘，更成為繼「光芒再現」後，季內第二匹五捷馬，季初46分起步，喪加目前100分，今季贏馬後評分將再上，攞硬本屆最大進步馬匹獎。相反與「發盈喜」同場之「光芒再現」衝擊一季六捷失敗，大熱倒灶跑尾三。綜觀全日十匹1號馬，共取三冠兩亞一季，上名率達六成。
尾場二至四名順序由後備補出的「豈得閒」、90倍大冷門「盈利駿馬」及半冷馬「活力寶」瓜分，四重彩派超過14萬元。至於騎師王則由34分的楊明綸勝出，打破雷神連贏七期之壟斷。