【睇通睇透】喜蓮獎星唔係副車

02754566

「步步友」及「新力風」今季都曾經孭133磅跑短途，分別勝出本地G2及G3，而上周日「幸福指數」贏本地G3沙田銀瓶，當日亦孭130磅。不過，讓磅制拉近了各駒的爭勝機會，高分馬縱使實力高強，但多負十幾廿磅之下，競爭力難免減弱，而所跑的路程越長，負重磅的影響就越大。
1600米或以上路程的讓磅分級賽，低分馬憑輕磅之利，往往可跑贏高分馬。今屆幾場中長途的本地G3，頭馬負磅都少於120磅，好似勝出婦女銀袋賽的「人強馬勁」(115磅)、一月盃「火紅人」(117磅)、百週年紀念銀瓶「天才」(115磅)，以及皇太后紀念盃「雄心巨龍」(115磅)。
本周日上演的1600米本地G3獅子山錦標，一對摩廐新勝馬「佳龍駒」及「喜蓮獎星」，分別孭117磅及116磅，雖然莫雷拉選騎前駒，但我卻認為後駒今仗捧盃的機會不甘後人。「喜蓮獎星」在港初出跑二班1400米後上入Q，歐洲自購馬能夠咁早有表現，質素肯定唔簡單，之後增程跑1800米贏馬，成為首匹勝出的V布歐洲自購馬，份量絕非等閒。翌仗跳幾級跑G1打吡大賽，沿途包尾留力直路衝一段，與「威利加道」及「代代為王」叮噹馬頭僅失三甲，跑第五表現已算好。上場大幅縮程跑1400米，大勝兩又四分三馬位，潛力深不可測，今場增程二百更啱跑，改配輕磅馬殺手史卓豐，絕對有條件以下犯上贏馬。