「麥紫莉」慘被主持寸爆口啞啞自認假AV女

擁有34G爆乳身材的麥紫莉（Chili）日前亮相由邵子風主持的亞視節目《發噏風》，她大爆當年自稱拍AV這條「絕橋」，其實出自前經紀公司老闆的主意，更誓神劈願向她保證「紅硬」之餘，更可以完美「收科」說服她配合。邵子風在節目中表示：「呢條橋其實係同喺彌敦道裸跑係冇分別，爆係會爆，但之後點呢？依家搞到額頭寫住『AV女』三隻字。」Chili補充：「係有個『假』字，『假AV女』。」另一主持呂珩更不忘揶揄她是「香港永遠榮譽AV女優」，令她面露尷尬之色。

返唔到轉頭
Chili在節目中，一改性感形象，以密實打扮亮相節目，但上圍仍然非常「凸出」，原來她已成功減了30磅，且煉成「瘦身不瘦胸」的秘技，邵子風又口花花說：「頭先喺化妝間見到佢，真係眼前一亮，忍唔住望多兩眼。」呂珩卻非常心水清，點出矛盾所在問Chili：「點解以前性感路線時唔減肥，依家開始密實番先減呢？」又令她無言以對。Chili呻自己「開壞咗頭」，做好心理準備日後的演藝路相當難行，圈內、圈外罵她的人多不勝數，邵子風也忍不住直言：「以依家形象，去老人院派幾多次曲奇餅都冇用。」不過亦安慰她香港人相當善忘，祝願她有更多正面的新聞慢慢蓋過負評。